Иргэдэд цахим хэлэлцүүлгийн систем хэрхэн ашиглах мэдлэг түгээж байна

“Эмэгтэй удирдагч сан”,”Нийгмийн дэвшил эмэгтэйчүүдийн хөдөлгөөн” ТББ-аас хэрэгжүүлж буй “Бидний оролцоо – Бидний өөрчлөлт” төслийн хүрээнд Баянзүрх дүүргийн 2,14 дүгээр хорооны иргэдэд зориулан “Хэрхэн цахим хэлэлцүүлэг системийг ашиглах” талаар сургалт зохион байгууллаа.

”Эмэгтэй удирдагч сан” ТББ-ын тэргүүн М.Болормаа төслийн зорилгын талаар ярихдаа, “Бидний оролцоо-Бидний өөрчлөлт” төслийн хүрээнд цахим засаглалаар дамжуулан хууль боловсруулах үйл явцад иргэдийн оролцоог нэмэгдүүлэх, иргэдэд цахим ашиглалтын чадвар, мэдлэгийг олгож, цаашид тогтвортой ашиглах, оролцоог ханган эргэх холбоог бий болгоход оршиж байгаа юм” гэв.

Төслийн хүрээнд бий болгох цахим хэлэлцүүлгийн систем нь цахим хуудсанд суурилан хийгдэх бөгөөд суурин болон хөдөлгөөнт /ухаалаг утас, таблет/ зэрэг интернэтийн төхөөрөмжид зориулсан аппликейшн /программ/ юм. Энэ системийг нэг талаас төр, нөгөө талаас иргэд хоорондоо харилцах болон мэдээлэл солилцох, зөвшилцөх асуудлыг шийдвэрлэх талбар болгон ашиглана. Төрийн байгууллага нь иргэдэд мэдээлэл түгээх, тэдний саналыг төрийн бодлого, шийдвэрт тусгах, гаргасан өргөдөл, гомдол, санал хүсэлтийг шийдвэрлэж ажиллах үүрэгтэй. Нөгөө талаас иргэд, иргэний байгууллагад хандан өргөдөл, гомдол гаргах, улс орны язгуур эрх ашиг, бүх нийтэд хамааралтай асуудлаар бусадтай үзэл бодлоо хуваалцах хэрэгцээ шаардлага байнга тулгардаг. Тиймээс уг системийг эдгээр хоёр талын чиг үүрэг, хэрэгцээ шаардлагыг нэгтгэн шийдвэрлэхүйц хоёр талт, эргэх холбоо бүхий харилцааны цогц хэрэгсэл болгохыг зорьж ажиллаж байна гэж төсөл хэрэгжүүлэгчид онцолж байна.

“Эмэгтэй удирдагч сан” нь цаашид энэ үйл ажиллагаагаа үргэлжлүүлэн тогтвортой ажиллах зорилгоор Баянзүрх дүүргийн 2,14 дүгээр хороодын Иргэний танхим болон дүүргийн иргэний танхимтай хамтран ажиллах санамж бичиг үзэглэсэн байна. Мэдээлэл түгээх үйл ажиллагаанд дүүргийн 100 гаруй иргэд оролцлоо.