УИХ-ын гишүүн асан Л.Гүндалайн ах нь дулаан,цахилгааны шугам дээр барилга барьж байна

О.Эрдэнэжаргал,Ж.Хишигбадрах захиралтай “Лакшири Хаус” компани 2013 оноос эхлэн “ Тансаг зэрэглэлийн орон сууц санал болгож байна” гэсэн утга бүхий сурталчилгаа явуулж иргэдийн мөнгийг залилж орон гэргүй болгож арай дэндүү хохироосон тухай өчигдөр хэвлэлийн хурал хийсэн. Тус компанийн эздэд хууль үйлчлэхгүй байгаа тухай захиалга өгсөн хохирогчид олон нийтэд хандсан нь энэ.

Одоогоор хохирогчдын тоо 60 гаруйд хүрсэн бөгөөд хохирлын хэмжээ нь Сүхбаатар дүүргийн прокурорын газрын тогтоосноор есөн тэрбум төгрөг болсон ажээ. “Лакшри Хаус”-ын эзэд хэнийг хохироож байгаагаа огт тоохгүй,дүлийрсэн мэт байгааг хохирогчид гомдоллож байна. Тэгвэл улс нийгэмд үүнээс илүү хохирол учруулах барилга барьж байгаа УИХ-ын гишүүн асан Л.Гүндалайн төрсөн ах Л.Баяндалай гэгчид Монгол Улсын хууль үйлчлэхгүй байна.

Тэрээр Зайсангийн зүүн талын хэрэглэгчдийг дулаан,цахилгаанаар хангадаг гол шугам дээр барилга барьдаг хүн түүнээс өөр байхгүй л болов уу. Үйлчилгээний төвийнхөө өргөтгөлийг барьж л байвал хууль,журам түүнд хамаагүй бололтой.

Тэр үйлчилгээний төв нь буулгаж нураах барилгын жагсаалтад нэлээд дээгүүр орсон. Уг нь Эрчим хуульд зааснаар бол, дулааны шугам,цахилгааны кабель явж байгаа газраас 5 м-ийн дотогш барилга байтугай амбаар ч босгож болохгүй.

Гэтэл Л.Баяндалай муйхарлан зүтгэсээр хамаг шугам кабелийг онгичоод гаргасан байгаа. Энэ ажлаа болиоч,зогсоогооч, хууль цаазаа дагаач гэж түүнд хэлээд нэмэргүй. Аргаа барсан Зайсангийнхны ярьж буйгаар, үйлчилгээний төвийн жинхэнэ эзэн нь Л.Гүндалай юмсанж. Төрсөн ах нь хар бор ажлыг хийж байгаа гэлцэнэ. Хуулиас дээгүүр толгойлох эрх ах дүү хоёрт баймгүй. Тэднийг дулаан,цахилгааны шугамаас холдуулах хүч Монголд байна уу. Осол аюул гарвал хэн хариуцах бол.