“Элэгний” дэлхийн шилдгүүд Монголд чуулна

Дэлхийн шилдэг эмч нар тун удахгүй Монголд чуулах гэж байна. Ирэх зургадугаар сарын 16-18-нд 25 улсаас элэгний шилдэг 35 эмч, профессорууд Монголд чуулж, элэгний өвчнөөс хэрхэн урьдчилан сэргийлэх, хүн бүр элгээ хэрхэн эрүүл байлгах, элэгний хатуурал хорт хавдраас яаж хол байх вэ зэрэг маш олон асуудлыг ярилцах болно.

Дэлхийн шилдгүүд Монголын болон гадаадын эмч нарт элэгний хатуурал, хорт хавдар болон элэгний өвчний оношилгоо эмчилгээг цаашид хэрхэн хөгжүүлэх, төр засаг ямар бодлого баримталж ажиллах талаар лекц уншина. Энэ удаагийн чуулга уулзалт “Элэгний C вирус болон хавсарсан халдварууд” гэсэн сэдвийг онцолж байгаа юм.

Тодруулбал, элэгний С вирусийн оношилгоо эмчилгээ, В, С вирусийн хавсарсан халдвар, В,Д вирусийн хавсарсан халдвар, В,С,Д вирусийн гурвалсан халдвар, элэгний вирус болон ДОХ-ын халдварын хавсарсан халдварын чиглэлээр дэлгэрэнгүй лекцүүдийг шилдгүүд уншина. Манай эмч нарын хувьд энэ удаагийн чуулгад оролцсоноор маш их юм сонсох, туршлага хуримтлуулах болно. Чуулга уулзалтыг элэгний “АСЕМ” гэж нэрлэж болох юм.

Манай эмч, эрдэмтдийг ДЭМБ дэмжиж ажиллахаа илэрхийлсэн байна. Монголчуудын дунд сүүлийн жилүүдэд элэгний өвчлөл ихэсч байгаа нь олон нийтийн болон мэргэжилтнүүдийн сэтгэлийг ихэд түгшээж байгаа. Үнэндээ үндэсний аюулгүй байдлын хэмжээнд хүрсэн тухай ч яригддаг. Тиймээс чуулга уулзалтын үеэр манай эмч,эрдэмтэд элэгний өвчлөл,эмнэлзүйн талаар дэлхийн шилдгүүдээс асууж санал солилцох нь алдаж болохгүй боломж гэж мэргэжилтнүүд ярьж байна.

“Элэгний С вирус болон хавсарсан халдварууд” олон улсын эрдэм шинжилгээний хурлын талаар тус хурлын шинжлэх ухааны зөвлөлийн дарга, хүндэт ерөнхийлөгч Ж.Амарсанаа ярихдаа, дэлхийн хэмжээний хурал эх оронд маань болж байгаа учраас оролцохыг хүссэн эмч нар бүгдээрээ оролцож дэлхийд нэртэй алдартай профессоруудаас хүссэн асуултаа асууж туршлага солилцох сайхан боломж нээлттэй юм. Уг чуулгыг Монгол Улсын Ерөнхийлөгчийн ивээл дор зохион байгуулахаар болсон бөгөөд хурлыг Монголын элэгний эмгэг судлалын холбооны ерөнхийлөгч, профессор О. Баатархүү даргалж явуулахаар болсон гэв.

Н.Намуун