Т.Бархүү түлэгдсэн охины эмчилгээнд сая төгрөг хандивлав

“Яг түүн шиг” шоуны гурван удаагийн ялагч,жүжигчин Т.Бархүү гэр бүлээрээ түлэгдсэн охинд сая төгрөгийн тусламж үзүүлжээ. Сайн сэтгэлийн үзүүрт сүү гэдэг. Авьяас билэг,хөлс хүчээрээ олсон шагналаасаа хүндийн өргөлтийн тамирчин, ОУХМ М.Анхцэцэгийн дүү М.Номин-Эрдэнийн эмчилгээний зардалд ийнхүү хандив өргөж сэтгэлийн дэм үзүүлсэн байна.

Олон нийтийн санаачилгаар “Дэлхийд тэрбумаар үнэлэгдсэн хүндийн өргөлтийн тамирчин М.Анхцэцэгийн дүүд туслацгаая” аян өрнүүлж эхэлснээс хойш сайн санаат монголчууд эмчилгээний зардлын 65 сая төгрөгийг босгох гэж хичээж байгаа билээ.

Хүндийн өргөлтийн тамирчин, ОУХМ М.Анхцэцэгийн дүү төрөлжсөн сургалттай, Биеийн тамир спортын дунд сургуулийн сурагч М.Номин-Эрдэнэ их хэмжээгээр түлэгджээ. Тиймээс түүнд ирэх сарын 15-ны дотор БНСУ-ын “Ханган сү” эмнэлэгт гүн түлэгдэлтийн дараах шатны хагалгаанд ороход 65 сая төгрөг шаардлагатай байгаа.

Жүжигчин Т.Бархүү шоуны ес дэх дугаарын үеэр шагналын мөнгөө сайн үйлсэд зориулахаа амласан юм. Хэн нэгнийг ядарч зүдэрч явахад нь туслана гэдэг агуу их буянтай үйлс.

“Яг түүн шиг” шоуны ялагч Г.Мэнд-Амар, Т.Бархүү нар шагналын мөнгөнөөсөө ОУХМ М.Анхцэцэгийн дүүд туслах санаачилгыг сошиал орчинд өрнүүлсэн нь сэтгэл уярам буян боллоо.

Н.Намуун