Монголчуудыг өмөлзүүлсэн буурай минь жаргах болтугай,хурай,хурай,хурай

Монгол Улсын түүхэнд мөнхөрсөн Манлай баатар Дамдинсүрэнгийн жич охин Лхамжав гуайн тарчигхан амьдарч яваа тухай телевизийн нэвтрүүлэг олон хүний сэтгэлийг өмөлзүүлсэн билээ. Монгол эх орныхоо бүрэн бүтэн байдал, сайхан ирээдүйн төлөө халуун амиа өргөсөн эх оронч,Манлай баатар Жамсрангийн Дамдинсүрэнгийн хүүгийн хүүхэд буюу жич охин Лхамжав гуайд Их аварга Д.Дагвадорж хоёр өрөө байр авч өгнө гэж амалсан ёсоороо Эх үрсийн баярын өдөр байрных нь түлхүүрийг гардууллаа.

Бас сар бүр хувиасаа тэтгэлэг өгөхөө амалж,банкны карт бэлэглэв. Үүнийг үзсэн,сонссон хүн бүрийн нүдэнд баярын совин гэрэлтэж,их аваргадаа талархаж буй. Дагвадорж аварга Манлай баатар Дамдинсүрэнгийн хүү Долсон вангийн зээ охин Лхамжав гуайг ядруухан амьдарч явааг сонсоод тэр даруй туслахаар шийдсэнээ хэлсэн. Эх үрсийн баяраар “Их аварга маань эр хүн юмаа” гэх бахархал амнаас ам дамжиж, ерөөлийн үг түүнийг дагалдав.

Сайн үйлс дэлгэрэх болтугай. Өвөг дээдсийн сүнс амирлах болтугай. Их аваргын маань ажил үйлс бүтэмжтэй байх болтугай гэж монгол түмэн ерөөж байна. Хурай,хурай,хурай,хурай.