Мэдээллийн технологийн салбарт хүч үзэхийг хүсэж буй залуусыг сургалтад хамруулав

Мэдээллийн технологи хүчээ авч буй энэ цаг үед монголчууд дэлхийтэй хөл нийлүүлэн байгаа. Монгол залуус Майкрософт, Google болон программ хангамжийн компаниудад хүчээ сорин ажиллаж байна.

Хүүхэд залуус мэдээлэл технологийн салбарыг илүү сонирхож байгаа өнөө цагт Нийслэлийн Залуучуудын хөгжлийг дэмжих төвийн дэргэд мэдээллийн технологийн чиглэлээр залуучуудыг үнэ төлбөргүй сургах төв ажилладаг. Уг төв БНСУ-ын Хамтын ажиллагааны байгууллагатай хамтран ажилладаг бөгөөд өнөөдөр тус төвд JAWA хөгжүүлэлт болон web хөгжүүлэлтийн хоёр дахь удаагийн сургалт эхэлж байна. Сургалтад хамрагдах хүсэлтэй 230 гаруй залуус шалгалтад орсноос 54 нь тэнцсэн байна. Тэд гурван сарын хугацаанд үнэ төлбөргүй суралцах юм. Сургалтын зорилго,ач холбогдлыг Нийслэлийн Залуучуудын хөгжлийн газрын дарга С.Сүх-Очир онцлохдоо “Бид мэдээллийн технологийн чиглэлээр залуучуудыг үнэ төлбөргүй сургалтад хамруулж өндөр цалинтай ажилд ороход нь дэмжлэг үзүүлэх бололцоог бүрдүүлж байгаа юм. Монгол залуучууд маань мэдлэг оюунаа дайчилж, дэлхийн түвшинд хүрэх, амьдралын чанараа дээшлүүлэх, өөрийн эх орондоо байгаа хэдий ч дэлхийн өндөр хөгжилтэй орнуудын төсөл дээр хамтран ажиллах тогтолцоог бүрдүүлэхээр ажиллаж байна.

Саяхан болсон Нийслэлийн Залуучуудын хөгжлийг дэмжих төвийн нээлт дээр Солонгосын мэдээллийн технологийн тэргүүлэх 8 компанийн төлөөлөл хүрэлцэн ирж цаашдын хамтын ажиллагааны тухай ярьсан. Энэ төвийн сургалтад сууж амжилттай төгссөн иргэдийг гадны төслүүд дээр ажиллуулах талаар шат дараатай арга хэмжээ хэрэгжүүлнэ.

Та бүхэнтэй адил энэ сургалтад суух хүсэлтэй олон залуучуудад энэ мэдээллийг түгээж хамтран ажиллаарай. Мөн сургалтдаа идэвхтэй оролцож сайн төгсөөд дараагийн шатны хөтөлбөрүүдэд хамрагдан дэлхийн хэмжээний боловсон хүчин болж эх орныхоо хөгжилд хувь нэмэр оруулаарай” гэв. Программ хангамжийн суурь сургалтад гурван сарын хугацаанд суралцсан иргэд мэргэжлийн сертификаттай төгсөх бөгөөд амжилттай төгссөн тохиолдолд сургалтын төвийн “Бизнес инкубатор төв”-д хамрагдан мэдээллийн технологийн чиглэлийн төсөл, хөтөлбөрт хамтран ажиллах боломж бүрдэх юм.