Тааруухан хоолоор дайлдаг солонгос эздэд даруулга хэрэгтэй болжээ

Монголчууд солонгос хоолны амтанд оржээ. Үүнийг далимдуулан “нүд улаан,мөнгө цагаан” гэсэн уриатай хоолны газрууд олшрох янзтай. Баянгол дүүргийн нутаг 3 дугаар хороололд үйл ажиллагаа явуулдаг солонгос эзэнтэй гэх  Ким Баб Чон Гуг  гэх хоолны газар бохир заваан гэсэн тодотголтой болжээ. Олон хөлийн газарт байрладаг болохоор тэнд хүн тасарна гэж үгүй.  Хэдийд ч орсон дүүрэн үйлчлүүлэгчтэй  байдаг газрын нэг нь Ким Баб Чон Гуг.  Ямагт хүн ихтэй болохоор орлого сайтай. Орлого сайтай болохоор өнөөгийн үйлчилгээнд мөрддөг “үйлчлүүлэгч бол хаан” гэдэг шударга зарчим солонгос хоолны газрынханд падлийгүй. Үйлчлэгч нар цатгалан өт шиг арай ядан хөдөлнө. Хоол захиалчихаад хийх байх юмаа олж ядан утсаа “маажиж” суугаа хүмүүс тамираа тасартал хүлээх энүүхэнд. Хоолноос нь ялаа гарна. Хоол хийдэг гал тогооны хажууд бие засах газартай. Эндэхийн үйлчилгээ,цэвэрлэгээ нүд хуурсан арай л биш ээ. Үнэндээ бохир гэдэг үг ч гоёдоно.  Хоол нь ил задгай байдаг болохоор  хүмүүсийн шүлс үсэрч  байгаа нь анзаарагдах нь сэтгэлд нэн таагүй.. Солонгос эзэн  үүдэндээ тамхи татаад хээвнэг зогсох нь бас л онцгүй харагдана.  Ер нь бид яагаад заавал бүдүүлэг үйлчилгээ,бохир орчинг сонгож мөнгө төлөх ёстой гэж. Нэгэнт мөнгөө төлж,цаг заваа зориулж байгаа юм чинь илүү соёлтой тав тухтайд нь орж үйлчлүүлье. Үүнийг хэлэхийн учир нь,

мэргэжлийн хяналтын байгууллага гэж  байна уу гэж асууж байгаа юм. Монгол хүнийг  эрүүл цэвэр орчинд эрүүл эко хүнс хэрэглүүлнэ,идүүлнэ, уулгана гэдэг шаардлага тавих төрийн хяналттын байцаагч нар Баб Чон Гуг гуайн хаагуур яваад байна вэ. Олон салбартай сүлжээ хоолны газарт  зөвшөөрөл өгсөн эрх мэдэлтэн байвал энэ газарт даруй саатаад үзнэ үү.

Н.Дөл