У.Хүрэлсүх хамгийн түрүүнд “шахааны” дэдүүдийг “топор”-дох нь зөв

2017 оны 09-р сарын 28 өдөр, 14 цаг 26 минутад нийтэлсэн (Сэтгэгдэл үлдээх )
hurelsukhh

Шинэ Ерөнхий сайд У.Хүрэлсүх танхимдаа хуучин бүрэлдэхүүнээс хэнийг ч оруулахгүй гэх бор шувуу Төрийн ордонд зөрөлдөн ниссээр байна. Яг үнэн бол сонор мялаах сайхан мэдээ юм. Одоохондоо үүрэг гүйцэтгэгчээр байгаа Д.Оюунхорол,А.Цогцэцэг нар шинэ танхимд үлдэнэ гэсэн бодолтой байгаа гэсэн. Яаж ч бодсон амттай хоолноос татгалзах зоригтой хүн ховор биз. Юутай ч яам,тамгыг өөрчлөхгүй,сандал ширээний нүүдэл хийхгүй гэж У.Хүрэлсүх хэлэх нь хэлсэн. Гэхдээ  дэд сайд гэдэг хэрэггүй орон тоог “устгаасай” гэж олон хүн ханцуйдаа залбирч буй. Ялангуяа ажил хаяхаар завдаж буй хэдэн мянган багш нар үүнийг илүү хүсч байна. Монгол даяар төрийн хямралтай зэрэгцээд  санхүү, эдийн засаг сульдаж доройтсоныг дээр доргүй мэдэж байгаа болохоор Ерөнхий сайд түүний багийнхан хэмнэлтээр урагшилбал юутай сайн.

Ж.Эрдэнэбатын Засгийн газар унах олон шалтгаан байсан ч түүний  багийн их бие нь  “данхар” толгойгоо дааж ядсан үрэлгэн бүтэц унах гол шалтгаан болсон. Тэгвэл тэр аппаратыг цомхон болгохгүйгээр цааш явна гэдэг У.Хүрэлсүхэд амаргүй байх нигууртай.

Хамгийн түрүүнд  дэд сайдууд,орлогч дарга гэсэн  байлаа гээд тус нэмэр бага,байхгүй гээд үгүйлэгдэхгүй албан тушаалыг “топор”-дох нь зөв. 13 дэд сайдын  дунд сайн нь ч байгаа л байх,муу нь ч байна. Ерөнхийд нь тэднийг хэрэггүй орон тоон дээрх  намын “шахааныхан” гэдгийг мэднэ.   Дэд сайд нар бараг бүгдээрээ тухайн яамны харьяа ТӨК -ийн ТУЗ-ийн дарга хийдэг. Энэ нь  гэр бүлийн гишүүд,хамаатан садан, найз нөхөд, нууц амрагаа ажилд оруулах гол “зэвсэг” болно.  Эдгээр хүмүүсээр дамжуулж өөрөө болон намын нөхдийнхөө бизнес шахааг хийж үр дүнд нь нэр төр нөлөөгөө сайжруулна. ТӨК-иуд нь дэддээ долигонож унаа машин, жолооч, утас, томилолт, наргиан цэнгээний зардал чирэгдлийг гаргана..
Хийсэн ажлаа жижиг гэж голохгүйгээ сүр дуулиантайгаар  хэвлэл мэдээллийн хэрэгсэл, сошиал медиа орчноор цацаж нэр төрийнхөө төлөө хөгийн  жүжиг тавих нь инээдтэй. Уг нь тэр хүн цалин авдаг ажлаа хийж байгаа гэдгээ мэддэггүй. Хмагийн аюултай нь, яамны нэгдсэн бодлого алдагдуулж сайдынхаа эсрэг ажиллах нь ч бий. Тэд бараг толгой дараалан намын хэн нэгэн нөлөөтэй хүний “халаасны хүн” байдаг учир сайдыг үл тоомсорлох  “бүдүүн хүзүүтэй” бөгөөд  хариуцлага хүлээдэггүй. Дэдүүдийг сайдыг тагнадаг 007 агент хэмээн сэм  хошигнодог нь  санаандгүй үг биш.  Энэ мэтчилэн олныг нуршиж болох.

 Тэгэхээр урагшлах замд “чөдөр” болсон дэдүүдийг үтэр түргэн “устгаж” чадвал ард түмэн У.Хүрэлсүхийгээ хурайлан талархана. Яам болгонд Төрийн нарийн бичгийн дарга байж байхад дэдүүд машин унаж,өндөр цалин хангамж эдэлж эрхлэн суух хэрэг байхгүй л дээ.

Эрхбиш У.Хүрэлсүх холч ухаантай хүн 13 дэд сайдыг сугандаа хавчуулаад,”Бурлаки на Волге” зураг дээрх шиг зүдрэн бүдчин зүтгэе гэхгүй болов уу. Тэр 13-ын эрх ямба,унаа хангамж, бензин тос,гадаад дотоод зугаалга,13 туслах, 13 жолооч гээд хэмнэгдэх юм олон байна. Эхний удаад дэдүүд гэх төрийн тэжээврүүдийг өшиглөөд хаячихвал цааш явах зам саад бэрхшээл багасаж таарна. Дараа нь төрийн банк,улсын үйлдвэрийн газруудын захирал,дарга нарын хэдэн арван саяар нь авдаг цалинг таначихвал ёстой гавьяа гэгч тэр болно. Цалингаа нэмүүлнэ гээд шийдчихсэн багш нарын цалинг хэмнэсэн мөнгөөрөө “амсуурга” төдий нэмэхэд хичнээн хүн баярлана гэж бодно. Өнөөдөр ард түмэн хэрхэн туйлдан ядарч байгааг ард түмэндээ ойр явдаг У.Хүрэлсүх та дэндүү сайн мэднэ. Ард түмэн чинь ядуу байна, хоногийн хоолоо олох гэж хөлс дуслуулан зүдэрч байна. Гэвч монгол хүний тэвчээр,жудагийг эрхэмлэн шүд зуун тэвчиж буй. Төрөөр тэжээлгэж байгаа ичих нүүргүй нөхдийг зоригтойхон “топор”-доод, сандал суудлыг чөлөөлөөд өгвөл  ард түмэн жоохон ч атугай амсхийнэ дээ.

Н.Наран

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл үлдээх

Нийт 5 сэтгэгдэлтэй
  1. Мал зүйч
     (202.179.31.***)
    2017/09/29 01:20

    Хамгийн түрүүнд орос хэлний багшаар багшилж чадаагүй орон тоо бөглөсөн САУЛЕ САЙДЫН УЧРЫГ ОЛОХ ХЭРЭГТЭЙ.Шаардлагатай бол алслагдсан аль нэг сумын сургуулийн байрны багшаар томилох хэрэгтэй.Харин телевизийн од болсоор багшлах арга барилаа ч мартсан байх.

    (0) (0)
  2. бүтэнбаяр
     (202.9.40.3.***)
    2017/09/28 20:20

    мөнгөө хэмнээрэй хүрэлсүхээ. пялдагчдыг битгий ойртуулаарай амжилт хүсье

    (0) (0)
  3. зочин
     (43.242.241.***)
    2017/09/28 17:20

    Дэдүүдийг цавчиж хая гай болсон юмнуудыг битгий давраа Топор ха аа. төрийнхний ся саяар авдаг цалинг багш нарт хувааж өг ий мажил хийвэл ард түмэн чамайг хайрлана үнсэнэээээ

    (0) (0)
  4. Anonymous
     (124.158.74.***)
    2017/09/28 15:04

    darwaan hariig boliulii odoo bolno

    (0) (0)
  5. Tuya
     (103.229.12.***)
    2017/09/28 14:52

    Ded saiduud hereggui oron too munuus mun. Ugui bolgoj tusuviin zardaliig hemneh n zuv

    (0) (0)