Өдөрт 30 минут алхвал зүрхний өвчнөөс сэргийлж чадна

Маргааш “Дэлхийн зүрхний өдөр”. Жил бүрийн 9 дүгээр сарын 29-нийг дэлхий нийтээрээ зүрхээ хайрлах өдөр болгон тэмдэглэдэгтэй холбогдуулан Шастины нэрэмжит улсын гуравдугаар төв эмнэлгийн зүрх судасны эмч нар сэтгүүлчдэд хандан мэдээлэл хийлээ.

Эмч нарын зөвлөж буйгаар,хүн бүр долоо хоногийн таван өдөр өдөрт 30 минут алхаж байх ёстой аж. Мөн шинэ, эрүүл хүнс хэрэглэж байхын ач тустайг онцлов. Хөгшин,залуу бүгдээрээ давсныхаа хэрэглээг багасган, өөх тосны хэмжээнд ч анхаарал хандуулж байх нь цусны даралт ихсэх өвчнөөс урьдчилан сэргийлэх болно гэдгийг зөвлөлөө. “Дэлхийн зүрхний өдөр”-т зориулан Улсын гуравдугаар төв эмнэлэг, Эрүүл мэндийн яам, Монголын зүрхний холбоо хамтран “Эрүүл мэндийн өдөрлөг”-ийг Сүхбаатарын талбайд зохион байгуулахаар болжээ.

Хэрэв та 12-16 цагийн хооронд үргэлжлэх өдөрлөгт ирвэл эрүүл мэндийн үзлэгт хамрагдах боломжтой. Тэнд мэргэжлийн эмч нар үзлэг  хийж, сургалт сурталчилгаа явуулна

Манай улсын хувьд нас баралтын тэргүүлэх шалтгаан нь зүрх судасны өвчин болж байгааг эмч нар анхааруулаад гурван хүн тутмын нэг нь зүрхний өвчнөөр хорвоог орхиж байгааг сануулав.

Зүрх судасны өвчний нас баралтын гол шалтгаан болох тархины харвалтын 62, зүрхний цусан хангамж хомсдох өвчний 49 хувийг цусны даралт ихсэлт үүсгэдэг аж. Энэ нь засаж болох эрсдэлт хүчин зүйл бөгөөд давсны зохистой хэрэглээг баримталж, өдөр тутам идэвхтэй хөдөлгөөн хийж, илүүдэл жингээ хаяж чадвал аюулыг холдуулах болно.

18-аас дээш насны хүн бүр өөрийн байх ёстой даралтыг мэдэж авах хэрэгтэй бөгөөд 40-өөс дээш насанд зовиуртай эсэхээс үл хамааран жилд нэг удаа урьдчилан сэргийлэх үзлэгт хамрагдаж байх хэрэгтэй гэж эмч нар зөвлөж байна. Зүрхний өдрийг тохиолдуулан Баянгол дүүрэг, 4 дүгээр хороололд байрлах ХААН банкны тооцооны төвд цусны даралт хэмжих булангийн нээлт болох юм. Хүмүүс голдээ өвдсөн хойноо эмнэлэгт ханддаг нь олонтаа. Тиймээс урьдчилан сэргийлэх нь чухал гэдгийг онцлон ийм булан нээж байгаа аж.

Н.Дөл