Гаалийн хяналтын бүсийн нэг цэгийн үйлчилгээний нээлт боллоо

Техник импорт дахь Гаалийн хяналтын бүсийн нэг цэгийн үйлчилгээний шинэ барилгын үйл ажиллагааны нээлт өнөөдөр боллоо. Энэхүү үйл ажиллагаанд “Техник импорт” ХК-ийн гүйцэтгэх захирал Д.Ганцэцэг, Гаалийн ерөнхий газрын Гаалийн хяналт,  шалгалтын газрын дарга Э.Мөнхөө, Улаанбаатар хотын Гаалийн газрын дарга Б.Батгэрэл, НМХГ-ын дэд дарга С.Даваасүрэн болон албаны бусад  хүмүүс оролцлоо.

Энэ үеэр “Техник импорт” ХК-ийн гүйцэтгэх захирал Д.Ганцэцэг хэлсэн үгэндээ “Манайх байгууллага үйл ажиллагаагаа явуулаад 60 гаруй жил болж байна. Бид нэг цэгийн үйлчилгээний шинэхэн барилгаа өнөөдөр ашиглалтад оруулж байгаадаа баяртай байна. Бидэнтэй хамтарч ажилладаг төр болон хувийн хэвшлийн байгууллагуудын дэмжлэгтэйгээр энэхүү том ажлын ард гарлаа. Өнөөдөр үүд хаалгаа нээж байгаад маш их баяртай байна. Манай энэхүү терминал нь нэг цэгийн үйлчилгээг иргэдэд ойртуулж, үйлчлүүлэгчдийг чирэгдэлгүй үйлчлүүлэх боломжийг олгож байгаа юм. Цаашид гааль, мэргэжлийн хяналтын байгууллага болон бидний хамтын ажиллагаа өргөжиж, хамтран ажиллах их боломж нээгдлээ хэмээн үзэж байна” гэлээ.

Дашрамд дурьдахад, 2012 онд Техник импорт дахь гаалийн хяналтын бүсийг “Техник импорт” ХК-ийн охин компани “Ти Ай Ложистик” ХХК нь ашиглалтад оруулж байжээ. Тэр нь  эдүгээг хүртэл үйл ажиллагаагаа явуулж байгаа юм байна. Мөн Гаалийн хяналтын бүсийн нэг цэгийн үйлчилгээг тав тухтай тохилог орчинд үзүүлэх зорилгоор Монгол Улсад жишиг болохуйц дотоод тохижилттой Терминалын шинэ барилгыг өнөөдөр ашиглалтад орууллаа.

Ингэснээр гааль, мэргэжлийн хяналт, банк, хамтран ажилладаг байгууллага, ажилтнуудын ажиллах нөхцлийг сайжруулж байгаа аж. Үүнээс гадна нэг цэгийн үйлчилгээнийхээ ажлын уялдаа холбоог ойртуулж, үйлчлүүлэгч хэрэглэгчиддээ тав тухтай орчинд түргэн шуурхай үйлчлэх нөхцлийг бүрдүүлж байгаа аж.

Мөн үйлчилгээгээ улам сайжруулах зорилгоор 2000 ам.метр талбай бүхий олон улсын стандарт шаардлагад нийцсэн агуулахын орчин үеийн бүрэн тоноглогдсон барилгын ажлыг эхлүүлснээ өнөөдөр хүлээн авлаа.