Ц.Баярцогт гэх даналзуур эрийн тухай мэдээллийг сошиалчид түгээсээр авай

Сүүлийн хэд хоногт олон нийтийн сүлжээгээр Ц.Баярцогт гэгч эрийн бардам занг баахан шүүмжлэв. Шүүмжлэх шалтгаан нь тэр нөхөр замын хөдөлгөөний хуулийг биелүүлэхгүй гэж үүргээ биелүүлсэн цагдааг доромжлон эсэргүүцсэнтэй холбоотой. Урсгал сөрөөд хурдалж яваа  Land cruiser 200 маркийн 1793 УБҮ улсын дугаартай машиныг зогсоосон цагдааг тэр эрхэм хүссэнээрээ доромжилжээ.

Түүний хэлж буйгаар, төрийн тусгай хамгаалалтын машинд замын хөдөлгөөний хууль хамаагүй юмсанж. Ц.Баярцогт “Төрийн ордон руу орох яаралтай ажилтай байна” гээд цагдааг хэл амаар доромжилж, салаавч энэ тэрийг үзүүлж багагүй дөвчигнөжээ.

Төрийн ордон руу яарч байгаа бол урсгал сөрөөд явж болно гэсэн заалт  байхгүй. Ц.Баярцогтыг   Сүхбаатар дүүргийн цагдаагийн хэлтсийн Хэрэг бүртгэх тасгаас Шалгажээ. Тэгээд тухайн зөрчлийг шалган 2017 оны 9 дүгээр сарын 28-нд Зөрчлийн тухай хуулийн 15.2 дугаар зүйлийн 2.3 дах хэсэгт заасан “төрийн албан хаагчийг хүч хэрэглэхгүйгээр эсэргүүцсэн, эсхүл доромжилсон” гэх заалтын дагуу 250 нэгжтэй тэнцэх хэмжээний төгрөг буюу 250.000 төгрөгөөр торгох шийтгэл оногдуулсан байна.

Адгийн зарга 10 хоногтой гэдэг болохоор түүнд оногдуулсан шийтгэл цагдаа,прокурор,шүүхийг дамжсаар эцсийн шийд хараахан гарах болоогүй аж. Замын цагдаа нар бандгар ландгар жийпийг тэр бүр шүгэлдээд дохиод зогсоох нь ховор. Хэрэв тусгай дуут дохиотой  бол  бүр зогсоодоггүй. Харин В.Отгонбаатар гэдэг зоригт залуу “Ланд 200”-г аймшиггүйгээр зогсоогоод  дуут дохионы тусгай зөвшөөрлийг нь лавшруулан шалгасан нь Ц.Баярцогтод таалагдсангүй. Энэ хэрэг ингэсхийгээд намжина. Харин хуулиас дээгүүр эрхтэй Ц.Баярцогт гэгч хэн бэ гэдгийг сошиал ертөнцийнхөн сонирхон тодруулж эхэлжээ.

Түүнийг Сэлэнгэ аймгийн Ерөө сумын нутаг Ялбагийн голын Хуст нарийн амны алтыг хууль бусаар олборлосон гэжээ. “Хуст нарийний ойг тэр чигт нь бульдозероор түрээд голын гольдролоор нь ухаж алт олборлосныг харвал зүрх шимширмээр болгосон. Хууль бус алт олборлож байхад нь цагдаагийнхан зогсоогоод хэрэг үүсгээд техникийг нь лацдаж битүүмжлээд л явдаг ч лацыг нь таслаад үргэлжлүүлэн ухсаар дуусгасан. Бүр гурван удаа зогсоосон ч тус болоогүй. Хорьсон ч ганцхан хонуулаад шүүх гаргачихдаг. Прокурор тэр чигтээ түүнд үйлчилдэг. Нутгийн иргэдийн нэхэмжлэлээр энэ хэргийн шүүх хурал 2017.10.04-д Сэлэнгэ аймгийн сум дундын эрүүгийн хэргийн анхан шатны шүүхэд болно. Уг шүүх хурлаар хууль бус олборлолтоос гадна тэр хэрэг дотор 162 сая төгрөгийн залилангийн үйлдэл мөн хөндөгдөнө” гэж бичсэн байна. .

Ц.Баярцогт нь Ерөнхий сайд Ж. Эрдэнэбат, Хууль зүйн сайд асан Х.Тэмүүжин нарын ойрын хүн гэлцэнэ. Сошиалчдын бичиж буйг анзаарвал,Ц.Баярцогттой холбоотой удаа дараагиийн хэргийг шалгахаар мөрдөн байцаагч дуудахад ирдэггүй гэнэ. Ц.Баярцогтын албан ёсны хаяг дээр Хууль зүйн сайд асан Х. Тэмүжин амьдарч байсан удаатай. Ц. Баярцогт нь УИХ-ын гишүүн Л.Элдэв-Очирын охин Аззаяатай амьдарч байгаад 2 хүүхэдтэй болоод салсан. Түүнээс хойш хоёр ч удаа амьдрал зохиосон гэдэг. Х.Тэмүүжин Хууль зүйн сайд болох үед хүүгээ гадаадад сургахын тулд Л. Элдэв-Очирт үрчлүүлсэн талаар баримт цацагдаж байсныг бас сануулжээ.
Ц.Баярцогт нь Ерөнхий сайд асан Ж.Эрдэнэбатын хуурай дүү гэж сошиалчид жиргэж байна. Учир нь  сая салаавч гаргахдаа унаж явсан машин нь Ж.Эрдэнэбатынх байсантай холбож болох аж.
Түүнээс гадна Ж.Эрдэнэбат Сэлэнгэ аймгийн Засаг дарга байх үед 2013 онд тус аймагт хууль бус олборлолт явуулж байгаад Ц. Баярцогттой хоёулаа УМБГ-т эрүүгийн хэрэг үүсгэн шалгуулж байсан. Цагдаагаас хэргийг АТГ-т шилжүүлсэн боловч уг хэргийг Нийслэлийн прокурорын газраас хэрэгсэхгүй болгосон гэжээ.  

Ц.Баярцогт нэг бус удаа хүн зодож танхайрсан гэнэ. Сүхбаатар дүүргийн цагдаагийн 1-р хэлтэст  түдгэлзээтэй хэрэг байсныг хэрэгсэхгүй болгосон. Түүний хэрэг яагаад хэрэгсэхгүй болдог вэ гэвэл том ар талтай. Төрсөн ээж Чимгээ нь прокурорын байгууллагад олон жил ажилласан хүн. Ээжээрээ овоглож явснаа  яагаад татгалзав гэсэн асуулт гарна. АНУ явах гэж ээжийнхээ эгч Цэцгээгээр овоглосон гэнэ.

 Овог байтугай нэрээ сольж Баяртогтох болсон гэх яриа ч олны чих дэлссэн дуулдана. Энэ мэтчилэн Ц.Баярцогт гэх хүний тухай хар цагаан олон баримтыг сошиалчид дахин дахин дэлгэхээ амалж байна. Ц.Баярцогт гэх даналзуур эрийн  хувьд ядарсан бор цагдаа руу салаавч гарган данхалзах юу ч биш бололтой.

Н.Намар