Дэлхийн шилдэг дуучин Монголдоо ирж, ая дуугаа өргөнө

Өнгөрсөн 6 дугаар сард “BBC” агентлагаас уламжлал болгон зохион байгуулдаг олон улсын дуурийн дуулаачдын  “Дэлхийн дуучин” тэмцээний тэргүүн байрыг хүртсэн Монгол Улсын гавъяат жүжигчин Г.Ариунбаатар монголчуудын бахархал билээ. Чансаа өндөр тэмцээний шилдэг шагналтан,авъяаслаг дуучин маань  дэлхийн таван шилдэг дуучны нэг болсон юм. Эх орныхоо нэрийг дэлхийд мандуулж яваа тэрээр тун удахгүй  “Монгол сонгодог-3” тоглолтоо Монголын ард түмэндээ толилуулахаар бэлтгэл ажилдаа орсон байна. Г.Ариунбаатар өөрийнхөө фэйсбүүк хуудсанд “Үргэлж үгийн сайхнаар тэтгэж, хийж бүтээхийн их хүслийг дэврээн, амьдралын минь замын чулууг түүж, хатуудаа хатуу, зөөлөндөө зөөлөн байж эмээлийн минь дөрөөнд сүү дусаасан элгэн монгол түмэндээ “Монгол сонгодог-3” концертоо толилуулах тов гарлаа” хэмээн тоглолтын зараа түгээсэн юм. Түүний тоглолт ирэх сарын 10,11-нд Соёлын төв өргөөнд болно.

Тэрээр бие даасан анхны “Монгол сонгодог” тоглолтоо 2012 онд хийж байсан бол “Монгол сонгодог 2” тоглолтоо 2015 онд үзэгч түмэндээ өргөн барьсан билээ. Дэлхийн шилдэг дуучин хүүгийнхээ тоглолтыг монголчууд хоног тоолон хүлээж байна.

Н.Дөл