Баруун бүсийн залуучууд Ховд аймагт чууллаа

МЗХ-ны Ерөнхийлөгч А.Мөнхбат хэлэхдээ “Эрхээ идэвхжүүлье: Залуучуудын оролцоо чуулган 2016 оноос эхлэн хэрэгжиж эхэлсэн. Энэхүү төсөл хөтөлбөр хэрэгжсэнээр залуус сонгууль болон нийгмийн үйл ажиллагаанд оролцох оролцоо нь эрс нэмэгдсэн. Баруун бүсийн залуучууд чуулгандаа идэвхтэй оролцож байгаад талархалтай байна.” хэмээсэн.

Чуулганы эхний өдөр “Залуучуудын оролцоо, хөгжил”, “Эмэгтэйчүүдийн оролцоо, манлайлал” гэсэн хоёр үндсэн сэдвийн хүрээнд болсон. МЗХ-ны дэргэдэх сургалт судалгааны Полиси төвийн гүйцэтгэх захирал, Нийгмийн удирдлагын докторант сургагч багш Б.Цэвэлмаа “Залуучуудын оролцоо, хөгжил” сэдвээр илтгэл тавьж, шийдвэр гаргах төвшинд залуучуудын утга учиртай оролцоог нэмэгдүүлэх, залуучуудын хөгжил сэдвээр сургалтыг орсон юм.

Дараагийн өдөр МЗХ-ны Ерөнхийлөгчийн онол бодлогын зөвлөх, “Их Монгол Язгууртан” ТББ-ийн Удирдах зөвлөлийн дарга Ө.Баяраа “Монгол Залуу Хүний Оролцоо”, “Бизнес Нэгдлийн дээд зөвлөл”-ийн тэргүүн А.Лхагвасүндэв “Иргэний оролцоо”, “Их Монгол Язгууртан “ТББ-ын Ерөнхийлөгч Г.Энх-Амгалан “Иргэний оролцоо: Оюуны хамтын ажиллагаа” сэдвээр илтгэл тавьж, сургалтыг явууллаа.

Мөн дөрвөн аймгийн төлөөлөл болсон залуус өөрийн аймгийн залууст тулгамдаж буй асуудал, хийж хэрэгжүүлж болох төсөл хөтөлбөр, цаашид хэрхэн хамтарч ажиллах талаараа санал солилцсон юм. Сургалтын үйл ажиллагаанаас гадна залуус сагс, гар бөмбөг, олс таталтын тэмцээнүүдээр хоорондоо өрсөлдсөн. Энэ үеэр манлайлагч тэргүүний залуусаа шагнаж, урамшуулсан билээ. Ийнхүү говийн бүсийн дөрвөн аймгийн залуус нэгдэн нийлж, биенээсээ суралцаж, туршлага судлан, шинэ шинэлэг санаагаа солилцон нэгэн цул болж чуулганы үйл ажиллагаанд сэтгэл хангалуун буцлаа.