Шинэ Монгол Технологийн Коллежийн оюутнууд Япон улсад зохиогдсон Дезакон тэмцээнд Тусгай шагнал хүртлээ

Шинэ Монгол Коосэн Технологийн Коллежийн оюутнууд Япон улсад зохиогдсон Дезакон тэмцээнд Тусгай шагнал хүртжээ.

Дезакон гэдэг нь япон улс дах нийт коосэн технологийн сургуулийн дунд зохион байгуулагддаг гурван тэмцээний нэг төрөл юм. Энэхүү гурван тэмцээний нэг нь бидний сайн мэдэх Robocon буюу robot contest, procont буюу programming contest мөн манай оюутнуудын оролцсон dezacon буюу design contest гэсэн төрөлтэй юм. Энэхүү тэмцээн нь 1977 оноос хойш тогтмол зохион байгуулагдаж байгаа аж.
Дезакон гэх тэмцээнд ихэвчлэн барилга дэд бүтэц болон архитектурын чиглэлээр сурдаг коосэний оюутнууд оролцдог. Энэхүү тэмцээн нь дотроо 4 төрөлтэй бөгөөд “Шинэ монгол”-ынхон бүтээцийн төрөлд нь оролцжээ.
Бүтээцийн төрлийн даалгавар нь гүүр хийх байдаг. Жил бүрийн даалгавар өөр өөрийн онцлогтой. Цаанаас нь хийх материал ба ямар даалгавар биелүүлэх ёстойг зааж өгдөг.
“Дезакон 2017” Гифү мужид болсон бөгөөд энэ жилийн хувьд 0,7- 3,0 мм ийн диаметртай зэс утас ашиглан гүүр хийх ёстой байсан. Тухайн гүүрэндээ 2 цэгээс ачаалал өгч мөн түүн дээр нэмээд хөдөлгөөнт ачаа буюу бөмбөг явуулах даалгавартай байсан.
Тэмцээн 2017.12.02-03-нд хооронд болсон бөгөөд Тэмцээнд Шинэ Монгол Технологийн Коллежийн Дэд бүтцийн багш Б.Наранбаатараар ахлуулсан 6 оюутны бүрэлдэхүүнтэй 1 баг / А.Үйлсбат, Ч.Нямдаваа, Д.Маралмаа, Т.Нинжин, Б.Баттулга, Э.Тэмүүлэн / бэлтгэж оролцсоноос Дэд бүтцийн ангийн Б.Баттулга, Э.Тэмүүлэн нар Япон улсад төлөөлөн очсон байна.
Тэмцээнд нийт Японы Коосэний 56 шилдэг баг оролцсоноос манай баг Зохион байгуулагчдын Тусгай шагнал хүртжээ. ШМТК-ийн оюутнууд тэмцээнд оролцохдоо өөрсдийн бүтээл болон Японоор ярих чадварын хувьд Япон оюутнуудаас дутахааргүй байсан нь олон хүний талархлыг хүлээж байна.