Хүчирхийллийн эсрэг аяныг хөдөөд өрнүүлж, хөгжлийн бэрхшээлтэй иргэд тэргэнцэр олголоо

Сэлэнгэ аймгийн Сүхбаатар, Алтанбулаг, Жавхлант, Шаамар, Хүдэр суманд “Хөгжлийн бэрхшээлтэй иргэдийн оролцоог дэмжье” уриатай “Сэргээн засалтын цогц үйлчилгээний арга хэмжээ”сэдэвт өдөрлөг 12 дугаар сарын 14-17-нд боллоо. УИХ-ын гишүүний Н.Оюундарийн санаачлагаар 2015 оноос эхлэн Сэлэнгэ аймгийн  хөгжлийн бэрхшээлтэй иргэдэд зориулж “Бид нэг зүрх сэтгэлтэй”шинэ жилийн цэнгүүнийг зохион байгуулж ирсэн юм. Энэ жилээс эхлэн тэднийг эрүүл мэндийн үзлэгт хамруулан, шаардлагатай зарим хүнд тэргэнцэр, гарын бэлэг гардуулан өгчээ. Тухайлбал, Сүхбаатар, Алтанбулаг, Шаамар, Жавхлант, Хүдэр суманд судалгаа явуулж халамж нэн шаардлагатай хүүхэд, том хүн нийлсэн 16 хүнд тэргэнцэр олгож бодит дэмжлэг үзүүлсэн байна.

Сэлэнгэ аймгийн Сүхбаатар суманд “Хүчирхийллийн эсрэг бид хамтдаа” сарын аяныг өнгөрсөн 11 дүгээр сарын 15-наас НАМЭХ-ноос эхлүүлжээ. УИХ-ын гишүүн Н.Оюундарийн санаачлагаар энэхүү ажлыг эхлүүлж хүн ам ихтэй Сүхбаатар сумын дунд сургуулийн 6-10 дугаар ангийн сурагчдын дунд дээрх аяны хүрээнд “Хүчирхийлэл бидний нүдээр” эссэ бичлэгийн болон “Би үүнийг тэвчихгүй” гар зургийн уралдааныг 1-5 дугаар ангийн сурагчдын дунд зохион байгуулсан юм. Сарын аяны хүрээнд зохион байгуулсан олон ажлын үр дүнд нийгэм ямархуу байгааг томчуудад харуулах хэмжээнд хүүхдүүд өөр, өөрийн сэтгэгдлээ илэрхийлсэн байна. Томчуудыг зөв байхыг сануулсан олон санууштай санаа, мэссэжийг багачууд маань өгч нийгэмд өөрсдийн дуу хоолойг хүргэж байгаа нь дэвшил юм.

Бидний ирээдүй болсон хүүхэд багачууд мэргэжлээ зөв сонгож чадвал алсдаа улс орныхоо хэрэгцээтэй салбар  бүрт хүрч ажиллаж дэлхийн бусад улсын адил хөгжилд дөтлөх учиртай. Тиймээс УИХ-ын гишүүн Н.Оюундарь тойргийнхоо төгсөх ангийн 440 орчим сурагчид мэргэжлээ хэрхэн зөв сонгох талаар мэргэжлийн багш нараар хичээл заалгуулж, зөвлөгөө өгч мөн хэрэгцээтэй ном, гарын авлагыг шинэ оны босгон дээр сурагчдад бэлэглэж оюуны хөрөнгө оруулалт хийлээ. Мөн 400 орчим багшид “Багшийн хөгжлийн дэвтэр”-ийг олгож сургалт зохион байгуулжээ.