Гомдогчид Ерөнхий сайдын суудлыг ганхуулж мэднэ

У.Хүрэлсүхийн Засгийн газар нас богинотой гэсэн яриа сонсдох болов. Хуучин оны сүүлээр Ерөнхий сайдын суудал ганхах нь тодорхой болсон тухай Төрийн ордонд зөрөлдөн нисдэг бор шувуунууд  шулганаж буй. Түүнийг шагнал бэлэг тарааж,ёолкдож явах зуур  хотын фракцынхан гарын үсэг цуглуулах ажлаа хийж байгаа гэж бор шувуу нэгэнтээ ам алджээ.

 Монгол Улсын Ерөнхий сайдад гомдсон УИХ-ын гишүүд У.Хүрэлсүхийг унагах гарын үсэг цуглуулаад ирэх нохой жилийн сар шинийн баяртай зэрэгцэн өргөн барина гэж бас нэгэн  бор шувуу шулганажээ. Засгаа байгуулахдаа сайдад санаатай байсан хүмүүсийг гомдоосонтой байж ч мэдэх. Зарим сайтад бичсэнээр, Ерөнхий сайдад хамгийн их гомдсон хүн бол эрхэм гишүүн Д.Тэрбишдагва гэх. Тэрээр ХХААХҮ-ийн сайдаар ажиллах сонирхолтой байсан ч У.Хүрэлсүх түүнийг засгийнхаа гадна үлдээсэн юм. Гадна үлдсэн  хүмүүсийн жагсаалтад Сангийн сайдад нэр нь дуулдаж байсан Ч.Улаан, Батлан хамгаалахын экс сайд Б.Бат-Эрдэнэ нар ч байгаа. Өмнөх засгийг унагахад харамгүй хүчин зүтгэсэн хүмүүсээс У.Хүрэлсүхэд гомдсон хүмүүс ч цөөнгүй бий. УИХ-ын гишүүн Т.Аюурсайхан, Х.Болорчулуун гээд өнгөрснийг нэхэн дурсвал дурдагдах хүн байнаа байна.
У.Хүрэлсүхийн хувьд Монгол Улсын төлөө хайр найргүй зүтгэнэ гэж амласан ч яг үнэндээ олны сэтгэлд нийцтэл ажиллахгүй байгаа тухай шүүмжлэл дуулдах болсон. Үүрэг гүйцэтгэгч нарын асуудлыг шийдэхгүй удлаа, төрийн албанд сонгон шалгаруулалт хэрэгтэй, бусадтай харилцахдаа чангаар загнах,уур уцаар ихтэй байж болохгүй гэхчлэн Ерөнхий сайдад хаягласан санаа авууштай шүүмжлэл аль эртнээс гарах болсныг ч бор шувуунууд сануулан нисэлдэж байна.

Н.Дөл