Утаатай тэмцэгчид хэвтээгээр жагсана

Нэгэн цагт “Азийн цагаан дагина” хэмээн олныг гайхшруулан  байсан улсын маань нийслэл өнөө цагт “Утаанбаатар”,”Угааранбаатар” бүр сүүлдээ “Хар баатар” нэртэй болжээ. Утаа  тортогтой тэмцэх аян чамгүй олон жил үргэлжилсээр байвч үр дүн нь гомдмоор муу. Төр засаг, нийслэлийн удирдлагууд арга хэмжээ авч байна хэмээн хэдэн арван тэрбумыг  салхинд хийсгэсэн. Ирээдүй хойчоо бодсон эцэг эхчүүд угаартай тэмцэхээр шийдэж дүлий төр засагтай аян дайныг үргэлжүүлж эхэлсэн билээ. Тэмцэгчид  “Утааны эсрэг аав ээжүүд” төрийн бус байгууллага бий болгож, засаг төрөөс ажлаа хийхийг шаардаж эхэлсэн юм.

Тус ТББ-аас нэлээд хэдэн удаа шаардлага, албан бичгийг удирдах дээд түвшний нөхдүүдэд илгээсэн байгаа. Гэвч өнөөг хүртэл утаа багасаагүй харин ч улам өтгөрч нэмэгдэж байна. Төрийн бус байгууллагынхан жагсч, цуглан, болж буй асуудлын талаар төрд дуу хоолойгоо хүргэсэн. Гэхдээ энэ нь тийм ч их үр дүнд хүргэхгүй байгаа юм. Тиймээс энэ сарын 13-нд Сүхбаатарын талбайд дахин жагсаал хийхээр товложээ. Өмнө нь,зогсоогоор жагсдаг байсан бол энэ удаад хэвтээгээрээ жагсаал зохион байгуулахаар шийджээ.

Тэдний ярьж буйгаар, Засгийн газар нийслэлийн агаарын бохирдлыг бууруулахад далайцтай арга хэмжээ авахгүй байна гэж үзэж, чимээгүй хэвтээ жагсаал хийхээр шийдсэн байна. Тус байгууллагынхан “Төр засгийн удирдлагууд 2004 оноос эхлэн Улаанбаатар хотын агаарын бохирдлыг бууруулах арга замын тухай ярьж эхэлсэн байдаг. Харамсалтай нь төсөл хөтөлбөрийн үр дүн муу байгаа нь өнөөдөр бидний нүдэнд ил тод харагдаж байна” гэж үзэн жагсаал хийхээр болжээ.