С.Бямбацогт гишүүн Ерөнхий сайдад хандаж, ард түмэн хохирох ёсгүйг сануулав

2018 оны 01-р сарын 24 өдөр, 16 цаг 05 минутад нийтэлсэн (Сэтгэгдэл үлдээх )
27152958_1287876328010529_1194993578_n

Бензин шатахууны хомсдол, хэрэглэгчдийн бухимдал дээд цэгтээ хүрч байна. Шатахуун имдортлогч компаниудын тусгай зөвшөөрлийг хурааж авахыг ард түмэн Засгийн газраас шаардаж эхлэв. Тэр ч байтугай Петровисийн ШТС-ууд төрийнх,газартай нь хамт буцааж ав хэмээн  сануулж байна. УИХ-ын гишүүн С.Бямбацогт шатахууны хомсдол бий болгож иргэдэд хүндрэл учруулж байгааг хэдий хүртэл тэвчих, хөдөө орон нутагт татварыг тэглэсэн атал шатахууны үнийг нэмж байгаад анхаарал хандуулахыг Ерөнхий сайд У.Хүрэлсүхээс хүсч асуулга тавьжээ.

Монгол Улсад хүчтэй төр байгаа бол үндэслэлгүйгээр үнэ нэмж байгаа шатахуун импортлогчидтой хариуцлага тооцох, үндэслэлтэйгээр үнэ нэмэгдэж байгаа бол үр дүнтэй хамтран ажиллах, яаралтай хэлэлцээрт орох, гарц шийдэл олох шаардлагатай гэж үзэж байна. Энэ бүхний эцэст иргэд хохирч болохгүйг хатуу санах хэрэгтэй  хэмээн  асуулгадаа онцолсон байна.

Тэрээр Ерөнхий сайдад хандан “Миний бие 2010 оноос хойш төвийн бүс болон алслагдсан бүс нутгийн бензин шатахууны үнийг ижил түвшинд байлгах асуудлаар удаа дараа асуулт, асуулга тавьж, шахаж шаардаж ажилласны үр дүнд 2015 онд баруун хилээр орж ирж буй автобензин, дизелийн түлшний гаалийн болон онцгой албан татварыг чөлөөлж баруун бүс нутгийн шатахууны үнэ литр тутамд 180-400 төгрөгөөр буурч Улаанбаатарын үнэтэй ойролцоо болж байсан. 2015 оноос хойш Цагааннуур, Ярант, Гашуунсухайт, Шивээхүрэн зэрэг баруун бүсийн боомтуудаар импортоор орж ирж байгаа автобензин, дизелийн түлшний татварт өөрчлөлт ороогүй, 0 хувийн татвартай байсан. Харин Сүхбаатар, Замын-Үүд, Алтанбулаг, Эрээнцав зэрэг төвийн болон, зүүн бүсийн боомтоор орж ирж байгаа автобензин, дизелийн түлшний татвар 2016 онд 3 удаа буурч, 2017 онд 2 удаа нэмэгдсэн байна. Гэтэл татварын өөрчлөлт ороогүй баруун бүсэд шатахууны үнэ нэмэгдэж, төвийн бүстэй харьцуулахад үнийн зөрүү ихэссээр байна. Төрийн бодлогын залгамж чанар үргэлжлэх учиртай. Цаашид нефть бүтээгдэхүүний үнийг нэмэгдүүлэхгүй байх, улсын хэмжээнд ижил үнэтэй байлгах талаар дорвитой арга хэмжээ авахгүй бол эдийн засаг дөнгөж сэргэж байгаа энэ үед ард иргэдийн амьдралд хүнд дарамт, хөшүүн дөнгө болох нөхцөл үүслээ” гээд асуулга тавьсан байна.

Н.Ялгуун

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл үлдээх