Тэнэгхэн ард түмэн чинь та нарынхаа үнэн нүүр царайг мэдэхийн ихээр мэднэ

Сүүлийн хорин хэдэн жилд Монголын төрийг ээлжлэн барьж байгаа хоёр намд итгэх ч хэцүү байх ч хэцүү цаг иржээ. Өчигдөр Д.Сүхбаатарын талбай дээр болсон жагсаалыг харахад АН ард түмэнд хайр зарлаад олны сэтгэлийг хөвсөлзүүлэн хөдөлгөх зорилотой байх аж.

Тэд юутай ч жагсаж цуглаж сурчээ. Жагсаал бараг л төрийг эсэргүүцэж байна гэхээсээ илүү театрчилсан үзүүлбэр маягтай болов. Цаашид иймэрхүү янзтай жагсвал хошин шогийн ямар ч хамтлагийн тоглолтоос дутахгүй үзүүштэй болж мэдэх нь. Жагсаалын төгсгөлд жагсагчид автобусандаа журам дэглэмтэй сууцгааж одох нь цалин хөлс дажгүй байсных биз.

Харин хоёр машин мөргөлдсөн байсныг харвал жагсаалыг үл мартагдах,улам амьд болгох гэснийх ч юм шиг. Төр барьж байгаа МАН, түүнийг байх суухын аргагүй шүүмжлэн мяалж байгаа АН-ын хэн алинд хөгжлийн бодлого барагтайхан гэдгийг ард түмэн аль хэдийнэ мэдсэн.  Сонгууль болохоор “ард түмнийг жаргаагаад өгнө” гээд л бие биеэсээ өрсөн сурталчилгаагаар бөмбөгдчихнө. Хөөрхий сонгогчид реклам,амлалт хоёрт нь пологтоод нэг л мэдэхэд МАН,АН хоёроо сонгочихдог гэмтэй. Сонгуулийн сурталчилгааны өдрүүдэд дугаар хорооны иргэдийг  арай л үнсэх шахаж байсан нэр дэвшигчид  саналыг нь авмагц тэнэгхэн сонгогчдыг танина гэдэг гонж. Эрхэм гишүүнтэйгээ уулзая,амлалтыг нь сануулъя гэвч барааг нь харах “хоншоор” дутна. Эрх мэдэл,мөнгөнд бялуурсан зөөлөн суудалд тухалсан эрхмүүд өнгөрснийг хэзээ ч эргэн санахгүй гээд “делете” хийсэн. Тэд Монголынхоо нэрийг бариад л дэлхий тойрон аялна,зээл гуйна. Хүү багатай хэдэн валют олно,тэрийгээ “олзны их нь наддаа” гэдэг зарчмаар хуваагаад хүртчихнэ. Дөрвөн жил төр барилцаж байна гээд хууль журам ярьж цэцэрхсээр хугацаагаа дуусгана. Иймэрхүү ааш араншинг тоочвол барагдахгүй.

Өчигдрийн жагсаалд оролцсон эрхэм дээдсүүдийг үнэтэй хүрэмний загвар үзүүллээ, их  мөнгөлөг байгаа нь илт гэсэн яриа түгжээ. Аргагүй дээ,ард түмэнд гурван есийн хүйтэнд ч тийм үнэт хувцас өмсөх хувь дутна. АН,МАН-ын хэн нь ч хэнийгээ шүүмжилж баалаад хэрэггүй. Та нарын өмссөн хувцас,унасан машин,амьдардаг хэдэн давхар хаус байтугай иддэг уудаг хоол ундны чинь ер бусын тансаг гэдгийг ард түмэн мэднэ. Нэг их даруу төлөв зан гаргаж, төсвийн мөнгөөр гар хөлөө угаадаггүй юм шиг цэмцэгнэж,төрөөс төрсөн тэрбумтнууд биш юм шиг ард түмэнтэй адилдаа адил,годилдоо годил байгаа юм шиг жүжиглэх тусам эрхмүүдийн рейтинг навс унана. 1990 оны жагсаалыг өнөөдрийнхтэй харьцуулшгүй байсныг тэр үеийн гэрч өвгөд хөгшид гайхширч байсныг хэлчихье. Өнөөдөр төрийн эрх барьж байгаа МАН одоохондоо Төрийн ордондоо аядуу тайван сууж байгаа. Гэвч тэд хоёрхон жилийн өмнө Жанжны талбай дээр нөмгөн сэлдэн шоудаж байснаа мартжээ. Нэгл өдөр өнгөринийг санах цаг ирнэ дээ.

Н.Дөл