Морь дагаж зугаацдаг баячууд хүний үрсийг хөлдөө чирэхээс ичээч

Гуравдугаар сарын 18-ны цэргийн баярын өдөр Монголын хурдан морины хорхойтнууд Говьсүмбэр аймгийн Баянтал суманд морь уралдуулж, харуй бүрийгээр замбараагүйтэв. Өмнөх жилүүдэд Дүнжингарав уралдааныг хаана хэзээ зохион байгуулах товыг Засгийн газраас албан ёсоор тогтоодог байв. Энэ жилийн хувьд уг уралдааныг зарлах тухай юу ч сонсогдоогүй. Харин Монголын морин спорт уяачдын холбоо гэх байгууллагынхан дураар авирлан өнгөрсөн ням гаригт уралдаан зохион байгуулжээ. Уралдааны үеэр 9 хүүхэд мориноос унаж, гурав нь эмнэлэгт хүргэгдсэн гэсэн мэдээ байна. Уралдаанд оролцсон хүүхдүүд 10-13 насных байв. Уг нь 12-оос доош настай хүүхдээр хурдны морь унуулахыг Засгийн газар хориглосон. Уралдааны үеэр цагдаагийн байгууллагын 110 алба хаагч, 23 автомашинтайгаар, Шүүхийн шийдвэр гүйцэтгэх газрын 25, Онцгой байдлын 25 албан хаагч тус тус үүрэг гүйцэтгэсэн гэж цагдаагийн байгууллагаас мэдээлэв. Хурдан морь уядаг, эзэмшдэг,уралдуулдаг хүмүүсийг дагаж морийг нь багахан хөлсөөр унадаг хүүхдүүд энэ удаа хаврын хавсарганд нүдүүлэн олныг цэнгүүлэв. Өөрийнхөө хүүхдийг нүүрэндээ үстэй адгуусанд мордуулаад уралдуулах байтугай түүхий өндөг шиг бөөцийлдөг баячууд хүний бяцхан үрсийг арай л дэндүү тохуурхаж байгаагаасаа ичээч. Хүүхдийн эрх ашгийн төлөө гээд цээжээ дэлдэж шүлсээ үсчүүлээд байдаг “хүүхдийн төлөө” –ийнхөн дугараач. Хүний хүүхдийг хэдэн халтар цаасаар хуурч,ядуу буурайг нь далимдуулан зугаацдаг булга минж өмссөн эрчүүд таахалзахаа болиоч.

Н.Дөл