Налайхын ЗДТГ-ын хамт олон 1.5 тонн хог цэвэрлэлээ

Нийслэлийн Засаг даргын захирамжийн дагуу “Улаанбаатар марафон-2018” бүх нийтийн марафон гүйлтийн цом Налайх дүүрэгт аялж байна. Үүнтэй холбогдуулан дүүргийн ЗДТГ-ын ажилтан, албан хаагчид өнгөрсөн бямба гаригт буюу 04 сарын 07-ны өдөр “10000 алхам” уриан дор явган аялалыг зохион байгууллаа.
Явган аялалд оролцогчид замаараа 1 дүгээр хорооны Энгэршанд орчмын хур хогийг цэвэрлэн, нийтдээ 1,5 тонн орчим хогийг ачиж тээвэрлүүллээ.

Дүүргийн ЗДТГ-ын дарга Ж.Алтангэрэл явган аялалд оролцогчдод хандаж хэлсэн үгэндээ: “2018 оныг иргэдийн оролцоотой амьдрах орчныг сайжруулах жил болгон зарласан. Мөн нийслэлийн Засаг даргын захирамжаар энэ 5 сард Улаанбаатар марафон бүх нийтийн гүйлт болно. Үүнтэй холбогдуулан 10000 алхам хийх зорилгоор өнөөдрийн явган аялалыг зохион байгуулж байна. Энэ явган аялалаа үр дүнтэй зохион байгуулахын тулд ЗДТГ-ын хамт олон маань замаараа хур хог түүж цэвэрлэн 1.5 тонн хогийг ачиж тээвэрлүүллээ. Үйл ажиллагаандаа идэвхтэй оролцсон хамт олондоо талархсанаа илэрхийлье” гэв.

Энэ үеэр ЗДТГ-ын хамт олны дунд олс таталтын тэмцээн, уралдааныг зохион байгуулж, Аж ахуйн тасгийн хамт олон тэргүүллээ. 2 дугаар байрт СТСХ, 1 хорооны баг, 3 дугаар байрт НХХ, 7 дугаар хорооны баг хамт олон шалгарлаа гэж Налайх дүүргийн ЗДТГ-аас мэдээллээ.