Залуучууд Туул голын эрэг дагуух хогийг цэвэрлэж, Улаанчулуут руу ачуулав

Улаанбаатарыг ундаалж байдаг Туул голынхоо эрэг дагуух хогийг цэвэрлэх их ажил үргэлжилж байна. Туул голын сав газрын захиргааныхан сайн санаат залуустай хамтран “Хоггүй эрүүл байгальд амьдаръя” уриан дор өнгөрсөн амралтын өдрүүдээр Туул голын эрэг дагуух хогийг цэвэрлэн цэмцийлгэв. Энэ өдөр “Ногоон тууз” аянд сайн дураар нэгдсэн “Фургон”, “УАЗ” группийн хамт олон Монголын залуучуудын холбооны гишүүн залуучууд, “Одонтой ээжүүд” ТББ-ын гишүүн залуухан ээжүүд мөн Улсын драмын эрдмийн театрын залуу жүжигчдийн төлөөлөл бүхий 100 гаруй хүн цэвэрлэгээнд оролцлоо.

Туул голын эрэг дагуух хогийг цэвэрлэхээр ирсэн залуус Баянзүрхийн гүүрнээс зүүн тийш 2,5 км газарт хур хог  цэвэрлэж, 2.5 тн гаруй хог хаягдлыг Улаанчулуутын хогийн цэг рүү ачуулж асгуулсан.

Өмнө нь Байгаль хамгаалах хаврын сарын аяныг угтан “Капитрон” банкны хамт олон 2018 оны 3 дугаар сарын 24-нд  Сонсголонгийн гүүрнээс баруун тийш Туул голын эрэг дагуух 1.1 км газарт их цэвэрлэгээ хийсэн юм. Цэвэрлэгээнд тус банкны 50 гаруй ажилтан оролцож 1.9 тонн хог хаягдыг цэвэрлэж Хан-Уул дүүгийн тохижилт үйлчилгээний хэлтсээс машин гаргаж ачуулсан. Мөн  Орон сууц, нийтийн аж ахуйн хэрэглэгчдэд үйлчлэх 12 дугаар төвийн хамт олон Баянзүрхийн гүүрнээс баруун тийш 1.1 км газарт их цэвэрлэгээ хийсэн. Уг ажилд тус төвийн 50 гаруй ажилтан оролцож, 1,5 тн хог хаягдлыг бөөгнүүлж Улаанчулуутын хогийн цэг рүү ачуулсан. Ийнхүү Туул голын дагуух хогийг цэвэрлэе гэсэн санаачилгатай залуус Туул голын сав газрын захиргаанд цэвэрлэгээнд оролцох саналаа ирүүлсээр  байна. Их хотын  иргэд биднийг ундаалж байгаа  цорын ганц голоо бохирдуулж,эрэг дагуух зүлэг ногоог харагдахгүй болтол хог овоолдог муухай зуршилтай болсныг нуух хэрэггүй. Туул гол дээр ирж алжаалаа тайлж агаар салхинд зугаацаж өнжөөд буцахдаа идсэн уусан хоол,ундааны сав гялгар уут архины шил гэх мэтчилэн хамаг хогоо хаяад явдаг нь хотынхны гэм биш зан болсон шүү дээ. Тэр бүдүүлэг зуршлаа орхиж хүн бүр цэвэр цэмцгэр байхыг эрхэмлэдэг болбол хатан Туул минь хогийн цэг мэт гуниглан үлдэхгүй. Үүнийг өөрсдөө хичээж үр хүүхэддээ хэлж сургавал эрхбиш сайн үлгэр болохсон билээ гэж цэвэрлэгээнд нэгдсэн залуус ярьж байв.

Н Дөл