Жудаг ёсоо мэддэг гэх аваргууд нохой шиг хэмлэлдэж, Бөхийн өргөө рүү мунхаглан довтолж байна

Үндэсний ёс уламжлалаа дээдэлдэг, эр хүний жудагтай энэ тэр гэж магтаал дагуулаад байдаг бөхчүүд яс булаалдсан нохой шиг авирлаж байна. Их аварга, арслангууд,УИХ-ын эрхэм гишүүд хэрүүл хараалыг магнайлж буй. Бөхчүүд Бөхийн өргөөгөө булаалдаад байгаа юм уу, Бөхийн холбоогоо булаалдаад байгаа юм уу гэдгийг ард түмэн ойлгох гээд ухаан уралдуулж байна. Хүмүүсийн ярихыг анзаарвал, А.Сүхбат аварга Бөхийн өргөөг, Д.Сумъяабазар аварга Хөдөө аж ахуйн хоршоологчдын холбооны байрыг авахаар мунхаглан улайрч байгаа гэлцэнэ. Тэд айлын хот руу өнгөлзсөн өлсгөлөн чоныг санагдуулан сувьдаглаж  байгаа нь олны эгдүүг хүргэж байна.

Ер нь Монголд өмч хөрөнгөтэй холбоотой  асуудлыг хуулиар шийдвэрлэдгийг эрхэм гишүүд эрхбиш мэдэж баймаар. Гэтэл бүр зодоон нүдээндээ хүрч,хууль хяналтын байгууллагыг сандаргасан нь хөгийн ч юмаа даа.  Бөхийн өргөөнд өнгөрсөн амралтын өдрүүдэд болсон үймээний үеэр дархан аварга Б.Бат-Эрдэнийн бие хамгаалагч Б.Одхүү УИХ-ын гишүүн,А.Сүхбатын хоолой багалзууртай дэндүү бүдүүлэг “ажиллаж”, биед нь гэмтэл учруулсныг сошиалаар шуугиж байна.  УИХ-ыг гишүүн халдашгүй дархан эрх энэ тэр бүр хамаагүй бололтой. Авах гэсэн юмаа л авч байвал яахаас ч буцахгүй болсон гэлтэй. Уг хэргийг Баянзүрх дүүргийн цагдаагийн хоёрдугаар хэлтэст шалгаж байгаа бөгөөд эрхэм гишүүн  гэмтлийн зэргээ тогтоолгохоор Шүүхийн шинжилгээний газарт хандсан байна.

УИХ-ын гишүүн А.Сүхбат, Б.Бат-Эрдэнэ,Д.Сумъяабазар нарын хэн нь ч Монголын өнгөлөг мөнгөлөг хүмүүсийн жагсаалтыг тэргүүлж байгаа. Гэтэл юу дутлаа гэж хэмлэлдэн шуналтана вэ. Бөхийн өргөө хэнийг ч зүгээр байхын аргагүй “дайлаар мордох”-д хүргэж байгаа их мөнгөний сав юмдаг уу. Бөхийн холбоог хэний хэн гуай ч удирдаж болох. Гэтэл яагаад заавал “Би удирдана” гэж тэмцэж босоод байгаа юм бол. Энэ бол маш их учиртай юмсанж.

Хашир бөхчүүдийн ярихыг сонсвол, баян дээрээ баян болох гэсэн эрхмүүд Бөхийн холбоог зүгээр орхиж чадахгүй. Тэд орондоо орох завгүй “орчилдон хөрвөх” нигууртай аж. Энэ жилийн хөрөнгө орлогын мэдүүлгээс харахад, УИХ-ын гишүүн А.Сүхбатын орлого жилийн дотор тав дахин буурч 283 саяас 57 сая болсон. Тэрбээр 2016 онд л Г.Бат-Очир, Д.Бат-Өлзий нараас 548 саяын авлагатай байсан бол энэ жилийн орлогын мэдүүлэгтээ ч бас өчжээ.  Хаан банкинд 143 саяын зээлтэй байсан. ХОМ-ээс нь харахад өр авлага, үнэт эдлэл нь хэвээрээ байгаа  гэнэ.

Тэр ч байтугай мал идээ нь үхэж үрэгдээгүй бөгөөд  100-гаад үхэр, 79 адуу нь толгой тоогоороо байгаа гэх. Тахиа шувуу нь тэгтлээ өсөж олшроогүй ч 30 гаран толгой бүтнээрээ байгаа. Эрхэм гишүүн 52 саяын хадгаламжаа 106 сая болгож өсгөжээ.А.Сүхбат 920 саяын үнэтэй 3 хаустай. Тэгсэн атлаа орон сууц байхгүй гэж хөрөнгийн мэдүүлэгтээ будилдаг хүн дээ.

Өчнөөн олон машин тэрэг, хувь эзэмшдэг компани,байр хаус гэх мэт зөндөө юм байхад тэр Бөхийн өргөө рүү улангасан довтолж яах нь вэ. Монгол төрийн зөөлөн суудал, бөхийг хүндэлдэг түмэн олны буянд Б.Бат-Эрдэнэ,Д.Сумъяабазар нар хэрхэн саятан живаатан болчихоод тэнгэрийн амьдралаар амьдардгийг энд нурших илүүц.  Ард түмэн та нарыг харж байна,хөрөнгийн мэдүүлгийг чинь уншиж байна. Эрхмүүд арай давраад байгаа юм биш биз. Эзэнгүй хөрөнгө  биш дээ, Бөхийн өргөөг “идэх” гээд хэрэггүй гэж сануулахад илүүдэхгүй болов уу. Тэр чинь Монголын ард түмний сэтгэлийн өглөг хандиваар боссон хөрөнгө шүү. Монгол бөхийн жудаг ёсыг та нар уландаа гишгэлээ, одоо ичиж амьдар.

Н.Дөл