Эмгэнэл

Монгол Улсын Соёлын гавьяат зүтгэлтэн
Нэвтрүүлэгч Жамъянгийн Батбаяр
1947-2018

Жамьян овогтой Батбаяр 1947 онд Баянхонгор аймгийн Галуут сумын “Хонгорын өвөр” гэдэг газар малчин ард Жамьянгийн ууган хүү болон мэндэлжээ. 1-8 насандаа эцэг эхийн гар дээр болон цэцэрлэгээр хүмүүжиж, 8 насандаа Баянхонгор аймгийн 10 жилийн сургуульд орж суралцан 1960-1961 оны хичээлийн жилд 7-р ангийг төгсөж, 1965 онд Завхан аймгийн Тосонцэнгэл хотын 10-н жилийн дунд сургуульд 10-р анги төгссөн. 1965-1967 онд Тосонцэнгэлийн МБК ажиллаж байгаад 1967 онд УБДС-ийн кино драмын ангид элсэн суралцаж төгсөөд 1971 оноос Улсын драмын театрт найруулагч, Улсын филармонид хөтлөгчөөр ажиллаж байв. Энэ хугацаандаа ЗХУ-ын мэргэжилтэнтэй хамтран “Эдип хаан”, Ардын жүжигчин Гомбосүрэнтэй хамтран “Тангараг” зэрэг жүжгүүд найруулан тавьж байсан юм.

Тэрбээр 1974 оны 7 дугаар сарын 1-нээс эхлэн БНМАУ-ын Сайд нарын зөвлөлийн дэргэдэх Мэдээлэл Радио Телевизийн Улсын Хороонд нэвтрүүлэгчээр томилогдон ажилласан юм. Энэ үеэс уран уншлагын төрлийг сонирхон оролдож, МУИС-ийн 25 жилийн ой, М.Горькийн мэндэлсний 100 жилийн ойд зориулсан Зөвлөлтийн зохиолчдын уран бүтээлийн уншлага, Ардын хувьсгалын 50 жилийн ойн бүх ард түмний урлагийн үзлэгийн уран уншлагын тэмцээн зэрэгт оролцож алт, мөнгө, хүрэл медаль, нэг, хоёр, гуравдугаар зэргийн дипломоор шагнуулж байжээ.

Ж.Батбаяр нь телевизийн урлагт ажил амьдралынхаа 40 гаруй жилийг зориулахдаа “Шүтээн”, “Бид ялав”, “Дуучин тагтаа”, “Манайд ирээрэй”, “Урилга”, “Дөрвөн бэрх”, “Агшин” зэрэг тухайн үеийн “Монгол телевиз”-ийн ихэнх нэвтрүүлгийг санаачлан хөтөлж үзэгчдийн хүртээл болгож байсан нь Алтан сан хөмрөгт хадгалагдан үлджээ. Ж.Батбаяр нь телевизийн орчуулгын киног олон хоолойгоор уншиж дуу оруулах ажлыг анх санаачлан хийж өнөөдрийн түвшинд хүргэсэн гавьяатай. Мөн радио телевизийн нэвтрүүлэгч бэлтгэх ажилд гар бие оролцож, өнөөгийн телевиз, радиогийн нүүр царай болсон нэгэн үеийн нэвтрүүлэгч нарын халамжлан хүмүүжүүлэгч багш нь байсан юм. Тэрбээр 1990-1996 онд Москвагийн Олон улсын радиод нэвтрүүлэгчээр ажиллаж арвин их туршлага хуримтлуулсан гал цогтой уран бүтээлч, уянга найргийн шүншигтэй үл тасрах аялгуу байлаа.

Нэвтрүүлэгч Ж.Батбаярын хийж бүтээснийг төр засаг өндрөөр үнэлж 1987 онд “Хөдөлмөрийн хүндэт медаль”, 1991 онд “Соёлын тэргүүний ажилтан”, 2001 онд “Соёлын гавьяат зүтгэлтэн” цолоор тус тус шагнажээ.

Ж.Батбаяр нь “Нэвтрүүлэгч” хэмээх нэр алдрыг өндөрт өргөж явсан давтагдашгүй дуу хоолой, авьяаслаг уран бүтээлч байлаа. Түүний халуун дулаан сэтгэл, нөхөрсөг зан чанар, нөмөр нөөлөг үе үеийн уран бүтээлчдийн зүрх сэтгэлд ямагт ариун сайхнаар дурсагдан үлдэх болно.

МҮОНРТ-ийн Захирлын зөвлөл, ахмадын зөвлөл, хамт олон