Зориулалтын суудал, хамгаалах бүс хэрэглэж хэвшицгээе!!!

 Баянзүрх дүүрэг дэх Замын цагдаагийн хэлтсээс хүүхдийг зам тээврийн ослоос хамгаалах, урьдчилан сэргийлэх чиглэлээр шат дараатай олон арга хэмжээ зохион байгуулж байгаа билээ. Ойрын өдрүүдэд шинэ хичээлийн жил эхлэх гэж байгаатай холбогдуулан замын хөдөлгөөний ачаалал ихэсч эцэг эхийн хараа хяналтгүй байдлаас үүдсэн зам тээврийн ослын дуудлага тасрахгүй байгаа юм.

Иймд дүүрэг дэх Замын цагдаагийн хэлтсийн албан хаагчид болон 102 дугаар сургуулийн багш нар дүүргийн 2 дугаар хороо Дарь-Эх орчимд замын хөдөлгөөнд оролцож буй иргэдэд болон зорчигчдод замын хөдөлгөөний осол, аваараас урьдчилан сэргийлж, хөдөлгөөнд анхаарал болгоомжтой оролцохыг уриалсан  сэрэмжлүүлэх самбарыг үзүүлж зам тээврийн ослоос урьдчилан сэргийлэх ажлыг амжилттай зохион байгуулж байна.

Дашрамд дурдахад, энэ оны эхний долоон сарын байдлаар дүүргийн нутаг дэвсгэрт зам тээврийн осолд орж буй нийт хүүхдийн 62 хувь нь 0-9 насны хүүхэд байгаа юм. Иймд дүүрэг дэх Замын цагдаагийн хэлтсээс замын хөдөлгөөнд оролцох үедээ бага насны хүүхдэд тавих хараа хяналтаа сайжруулж, тээврийн хэрэгслээр зорчих үедээ суудлын бүс зүүж, бага насны хүүхдийг тээвэрлэхдээ зориулалтын суудал хэрэглэхийг уриаллаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.