Э.Энхриймаа “Сүрьеэгүй Монгол” төслийг дэмжихийг олон нийтэд уриаллаа

“Miss World-2018” тэмцээнд эх орноо төлөөлөн оролцох Э.Энхриймаа өнөөдөр (11-р сарын1) “Тогтвортой хөгжлийн эрин үед сүрьеэ өвчнийг устгах олон талт хамтын ажиллагаа” үндэсний чуулганд оролцож, Монгол Улсад нэн тулгамдаж буй эрүүл мэндийн асуудал болох сүрьеэтэй тэмцэх чиглэлээр өөрийн санаачлан эхлүүлсэн “СҮРЬЕЭГҮЙ МОНГОЛ (END TB)” төслөө чуулганы индрээс танилцууллаа.

Монгол Улсын Ерөнхий сайдын ивээл дор зохион байгуулагдсан энэ чуулганаар дэлхий дахинд нийгмийн эрүүл мэндийн тулгамдсан асуудал болоод байгаа сүрьеэтэй тэмцэх талаар баримталж буй чиг хандлага, тухайн чиглэлээр Монгол Улсын хэрэгжүүлж байгаа бодлого, үйл ажиллагаа, сүүлийн үеийн судалгааны үр дүнгүүдийг хэлэлцэж, цаашид авах арга хэмжээний тухайд санал солилцон зөвлөмж гаргах зорилготой юм.

Манай улсад сүрьеэгийн өвчлөлийн 65 хувийг ид хийж бүтээх насны 15-44 насныхан эзэлж, айл гэр болж, ажил хөдөлмөр эрхлэн нийгмийн баялаг бүтээлцэх үнэт цаг хугацаагаа өвчний улмаас алдаж байгаа, жил бүр 4000 хүн сүрьеэгээр өвчилж, 200 гаруй хүн нас бардаг зэрэг сэтгэл эмзэглэм олон баримт Э.Энхриймаад сүрьеэ өвчний тархалтыг бууруулах, түүнтэй тэмцэх чиглэлээр хүмүүнлэгийн ажил өрнүүлэх сэдэл төрүүлжээ. Иймээс тэр сүрьеэтэй хүмүүст туслах, иргэдийг энэ өвчний талаар мэдлэгтэй болгох замаар урьдчилан сэргийлүүлж сургахад чиглэсэн гурван багц ажил эхлүүлээд байгаагаа чуулганд оролцогчдод таницуулсан юм. Үүнд:

1.Тэрбээр ерөнхий боловсролын сургуулийн сурагчдаар “Сүрьеэгүй гэр бүл” сэдэвт зураг зуруулж, энэ асуудалд хүмүүсийн анхаарлыг хандуулахын тулд олон нийтийн газар хэд хэдэн цуврал үзэсгэлэн зохион байгуулж байгаа билээ. Үүгээрээ эрүүл мэндийн зөв дадал хэвшилд сурах нь ирээдүйд эрүүл, аз жаргалтай амьдрах хөрс суурь болдог гэдгийг хүүхдэд багаас нь ойлгуулахыг эрмэлзэж байгаа юм. Үндэсний чуулганы үеэр ч хүүхдүүдийн бүтээлээр үзэсгэлэн гаргасан бөгөөд чуулганд оролцогч гадаад, дотоодын хүмүүс түүнийг сонирхон үзэж, санаа сэдэл авах зүйл цөөнгүй байгааг тэмдэглэж байсан юм.

2. Сүрьеэтэй өвчтөнүүдэд үзүүлж буй хүмүүнлэгийн тусламжийн бас нэг чухал арга хэмжээ нь албан байгууллага, ард иргэдийн дунд явуулж буй “100+ төгрөг” аян юм. Хэдийгээр 100 төгрөг маш бага мөнгө боловч “Дуслыг хураавал далай” болдгийн үлгэрээр олны өгсөн хандиваар “Энхрий эрдэнэ” сан байгуулж, цуглуулсан мөнгөөрөө сүрьеэ өвчтэй 1600 хүний хэрэглэх аминдэм, элэг хамгаалах эм, бэлдмэлийг Халдварт өвчин судлалын үндэсний төвийн удирдлагад хүлээлгэн өгсөн юм. Өнөөдрийн арга хэмжээнд оролцогчид ч уг санд хандиваа нэмэрлэсэн билээ.

3. Э.Энхриймаа “Сүрьеэгүй Монголын төлөө!” видео сурталчилгаагаараа сүрьеэгээр өвчилсөн хүмүүсийг ялгаварлан гадуурхахгүй, нийгмээс тусгаарлахгүй байх нь тэдэнд мөнгө төгрөгнөөс хавьгүй чухал бөгөөд сэтгэл санааны асар том дэмжлэг болно гэдгийг залуучууддаа уриалж байгаа юм.

Э.Энхриймаа гоо үзэсгэлэн, авьяас билиг, оюун ухаанаараа дэлхийд танигдсан Хятадын тэргүүн хатагтай Пэн Лиюань захидал илгээж, АНУ-ын Нью- Йорк хотод болсон НҮБ-ын Ерөнхий Ассамблейн 73 дугаар чуулганд Дэлхийн эрүүл мэндийн байгууллагын Сүрьеэгийн сайн санааны элчийн хувиар түүний илгээсэн дүрс бичлэгийг сонирхон үзсэнээ дурдаад сүрьеэ өвчнөөс сэргийлэх талаар Хятадын Засгийн газраас хэрэгжүүлж буй ажил, ололт туршлагаас хуваалцахыг хүссэнээ энэ үеэр мэдэгдсэн билээ. Тэрбээр бас “Сүрьеэгүй Монгол” төсөл Улаанбаатарт хэрэгжиж эхэлсэн ч орон нутагт хараахан хүрээгүй байгаа тул хүмүүнлэгийн тусламжийн энэ ажлаа үргэлжлүүлэхэд нь дэмжлэг үзүүлэхийг чуулганы индэр дээрээс олон нийтэд уриалсан юм.