Спортын дөрвөн төрөлт тэмцээнд АРХИВЫН ЕРӨНХИЙ ГАЗРААС амжилттай оролцлоо

Хууль зүй, дотоод хэргийн яамны харьяа агентлаг, байгууллагуудын төв аппаратын ажилтан, алба хаагчдын дунд жил бүр уламжлал болгон зохион байгуулагддаг спортын наадам 2019 оны 04 дүгээр сарын 29-30-ны өдрүүдэд амжилттай болж өндөрлөлөө.

Энэ жилийн спортын наадмыг Дотоод хэргийн их сургууль түүхт 85 жилийн ойгоо угтан зохион байгуулсан бөгөөд нийт 13 байгууллагын 12 багийн 400 гаруй тамирчид спортын дөрвөн төрлөөр буюу шатар, олс таталт, волейбол, сагсан бөмбөгийн төрлөөр оюун ухаан, ур чадвар, авхаалж самбаагаа сорин өрсөлдсөн юм. Мөн байгууллагуудын удирдлагуудын дунд дартсын тэмцээн зохион байгуулж байр эзлүүллээ.

Тэмцээн маш өрсөлдөөнтэй, нөхөрсөг болж өндөрлөн төрөл тус бүрт шилдгүүдийг тодруулсан бөгөөд Архивын ерөнхий газрын хувьд Волейболын төрлөөр эмэгтэй баг тамирчид Алтан медаль, багийн ахлагч М.Тунгалагсайхан нь шилдэг тоглогчоор тус тус шалгарлаа.

Ийнхүү тэмцээний нийлбэр дүнгээр тэргүүн байрт 19 оноогоор доктор, профессор, хошууч генерал Ш.Лхачинжав захиралтай Дотоод хэргийн их сургуулийн баг шалгарч, шилжин явах цомыг хүртсэн бол хоёрдугаар байрт 23 оноогоор бригадын генерал Д.Батжаргал захиралтай Шүүхийн шинжилгээний үндэсний хүрээлэнгийн баг, гуравдугаар байрт 29 оноогоор цагдаагийн хурандаа С.Баатаржав даргатай Цагдаагийн ерөнхий газрын баг тус тус шалгарч ДХИС 2020 оны спортын тэмцээнийг зохион байгуулах эрхийг авснаар энэхүү тэмцээн өндөрлөлөө.

Тус тэмцээнд амжилттай оролцсон Архивын ерөнхий газрын нийт баг тамирчиддаа баяр хүргэе.