Зэвсэгт хүчний 013 дугаар ангийг Цэргийн гавьяаны улаан тугийн одонгоор шагналаа

Монгол Улсын Ерөнхийлөгч Х.Баттулга Зэвсэгт хүчний 013 дугаар ангийг Цэргийн гавьяаны улаан тугийн одонгоор шагнах тухай зарлиг гаргасантай холбогдуулан Цэргийн гавьяаны улаан тугийн одон гардуулах ёслол өнөөдөр Зэвсэгт хүчний 013 дугаар ангийн жагсаалын талбайд боллоо.

Монгол Улсын Ерөнхийлөгчийн зарлигийг уншиж сонордуулсны дараа Монгол Улсын Ерөнхийлөгчийн Тамгын газрын дарга З.Энхболд Цэргийн гавьяаны улаан тугийн одонг тус ангийн Байлдааны туганд зүүж, одоо үүрэг гүйцэтгэж байгаа болон өмнө нь үүрэг гүйцэтгэж байсан нийт бүрэлдэхүүнд баяр хүргэн үг хэлсэн юм.

МОНГОЛ УЛСЫН ЕРӨНХИЙЛӨГЧИЙН ТАМГЫН ГАЗРЫН ДАРГА З.ЭНХБОЛД:

“Эрхэм генерал, офицер, ахлагч, 013 дугаар үе үеийн ажилтан, алба хаагч Та бүхэнд энэ өдрийн мэнд хүргэе.

Цэргийн ууган ангиудын нэг, “Холбооны тусгай хороо” хэмээн алдаршсан Зэвсэгт хүчний 013 дугаар ангийн бие бүрэлдэхүүний амрыг эрж, түүхт 90 жилийн ойн баярын мэндийг дэвшүүлье.

1929 онд байгуулагдсан холбооны тусгай сумангийн Ховд, Улиастай, Хэнтий, Баянтүмэнгийн цэргийн хороо, ангиудыг Цэргийн яамтай холбоогоор хангаж байсан, 1939 оны Халхын голын байлдаан, 1945 оны чөлөөлөх дайн, 1947-1948 оны Баруун хилийн тулгаралтад Монгол Улсын тусгаар тогтнол, эрх чөлөө, бүрэн бүтэн байдлыг батлан хамгаалах үндсэн үүргээ нэр төртэй биелүүлж, Зөвлөлт Холбоот Улсын Зэвсэгт хүчинтэй хамтарсан “Зоргол”, “Хэрлэн-73”, “Говь-77”, 1979 оны хээрийн сургуулиудын холбоо, мэдээллийг амжилттай зохион байгуулж ирсэн түүхэн замналтай.

Мөн орчин үеийн энхийг дэмжих Ирак, Сьерра Леон, Чад, Өмнөд болон Хойд Суданы ажиллагаа, олон улсын Дархан, Сэлэнгэ, “Хааны эрэлд” зэрэг хамтарсан сургууль, сургалт дадлага, “Аравт” морин цэргийн уралдааны бодит холбоо, мэдээллийг зохион байгуулж, тавигдсан үүргийг амжилттай биелүүлж байгаад Монгол Улсын Ерөнхийлөгч, Зэвсэгт хүчний Ерөнхий командлагчийн нэрийн өмнөөс талархал илэрхийлье.

Ардын хувьсгалт цэргийн ангиудаас цэргийн сургалт бэлтгэл, сахилга зохион байгуулалтаараа шалгарсан Холбооны тусгай хорооны гавьяаг үнэлж, 1936 онд “Алтан гадас” одонгоор шагнаж байсан бол түүхт 90 жилийн ойг тохиолдуулан Монгол Улсын Ерөнхийлөгч, Зэвсэгт хүчний Ерөнхий командлагч зарлиг гаргаж, Цэргийн гавьяаны улаан тугийн одонгоор шагналаа.

Энэхүү шагнал нь Монгол Улсын тусгаар тогтнол, бүрэн бүтэн байдлыг хамгаалах эрхэм үүрэгтэй цэрэг дайчдын эх оронч үзэл, хүмүүжлийн илэрхийлэл болж байх болтугай.

Цэргийн холбоочид тайван цагийн болон байлдааны, үндсэн болон тусгай чиг үүргүүдээ хариуцлагатай биелүүлж, мэргэжлийн мэдлэг, ур чадвараа гүнзгийрүүлэн ажиллах болно гэдэгт эргэлзэхгүй байна.

Анги бүрэлдэхүүний эх орноо батлан хамгаалах, Монгол Улсын зэвсэгт хүчний удирдлагын холбоог найдвартай хангах үйлсэд ажлын амжилт, нийт алба хаагчдад эрүүл энх, сайн сайхныг хүсэн ерөөе.

Монгол цэргийн хийморь золбоо, холбоочин дайчдын яруу алдар бадрах болтугай” гэлээ.