Архивын ерөнхий газрын дарга С.Энхбаатар Олон улсын архивын зөвлөлийн Зүүн азийн бүсийн салбар зөвлөлийн хуралд оролцлоо

Олон улсын архивын зөвлөлийн Зүүн азийн бүсийн салбар зөвлөлийн Удирдах зөвлөлийн болон Нэгдсэн хуралдаан Япон улсын нийслэл Токио хотноо 2019 оны 11 дүгээр сарын 25-27-ны өдрүүдэд зохион байгуулагдлаа.

Манай орны архивын байгууллагын хувьд тус зөвлөлийг үүсгэн байгуулагчдын нэг бөгөөд энэхүү зөвлөлийн Удирдах зөвлөлийн гишүүн байгууллага юм. Архивын ерөнхий газар нь тус зөвлөлөөс зохион байгуулдаг жил бүрийн хуралд тогтмол идэвхтэй оролцдог бөгөөд ээлжит хуралдааныг 1994, 2006, 2012 онд Монгол Улсад тус тус зохион байгуулж байсан билээ.

Удирдах зөвлөлийн энэ удаагийн ээлжит хуралд Япон улсын Үндэсний архивын газрын ерөнхийлөгч, ОУАЗЗАБСЗ-ийн дарга Такео Като, БНСУ-ын Үндэсний архивын газрын дарга Соёон Лий, Монгол Улсын Архивын ерөнхий газрын дарга С.Энхбаатар, БНХАУ-ын Улсын архивын удирдах газрын дэд дарга Лиу Лишинг, Олон улсын архивын зөвлөлийн ерөнхий нарийн бичгийн дарга Сейлис Антеа, ОУАЗЗАБСЗ-ийн ерөнхий нарийн бичгийн дарга Сангмин Лий, тус зөвлөлийн тусгай зөвлөх, хүндэт гишүүн Саймон Чу, БНХАУ-ын Засаг захиргааны онцгой бүс Макао, Хонконгийн улсын архивын байгууллагын төлөөлөл тус тус оролцлоо.

Уг хурлаар зөвлөлийн үйл ажиллагаа, цахим хуудас, санхүүгийн тайлан, гишүүнээр элсэх хүсэлт, гишүүн улсын архивч нарыг сургаж, мэргэшүүлэх, 2019-2023 онд ажиллах Удирдах зөвлөлийн бүрэлдэхүүн, дараагийн хурлыг зохион байгуулах улс орныг сонгох зэрэг асуудлыг хэлэлцэж, Нэгдсэн хуралдаанд танилцуулахаар шийдвэрлэсэн.

Нэгдсэн чуулганд Япон, Монгол, БНХАУ, БНСУ, Хонконг, Макао, Тайланд зэрэг 7 улсын 176 төлөөлөгчид оролцсон ба Монгол Улсаас Архивын ерөнхий газар, Батлан хамгаалахын төв архив, Баянхонгор аймгийн ЗДТГ-ын Архивын тасаг, “Эрдэнэт үйлдвэр” ХК, “Тэнгэр” дээд сургуулийн төлөөлөл тус тус оролцов.

​Нэгдсэн чуулганаар Удирдах зөвлөлийн хурлаас гарсан саналыг хэлэлцэж, баталсан бөгөөд зөвлөлийн даргаар БНХАУ-ын Улсын архивын удирдах газрын дарга Ванг Шао Зонгийг, дэд даргаар БНСУ-ын Үндэсний архивын газрын дарга Соёон Лийг, гишүүнээр Япон улсын Үндэсний архивын газрын ерөнхийлөгч Такео Като, МУ-ын Архивын ерөнхий газрын дарга С.Энхбаатар, Хонконгийн Засаг захиргааны Албан хэрэг хөтлөлтийн албаны дарга Лук Юк-шан, Макаогийн архивын дарга Лау Фонг нарыг тус тус шинээр, ерөнхий нарийн бичгийн дарга, санхүү хариуцсан ажилтан нарыг улируулан сонголоо. Мөн Хонконгийн Албан хэрэг хөтлөлтийн албыг Удирдах зөвлөлийн гишүүнээр, БНХАУ-ын Фужоу мужийн архив болон Ренмин их сургуулийг “С” ангилалын гишүүнээр тус тус элсүүлж, 2020 онд зөвлөлийн хурлыг БНСУ-д зохион байгуулахаар шийдвэрлэв.

Архивын ерөнхий газрын дарга С.Энхбаатар хуралдааны үеэр БНСУ-ын Үндэсний архивын газрын дарга, хатагтай Соёон Лий болон БНХАУ-ын Улсын архивын газрын орлогч дарга Лиу Лишинг нартай уулзаж, хоёр орны түүх соёлд холбогдох баримтыг судалж, илрүүлэх, хуулбар хувийг солилцох, судлаач мэргэжилтнийг ажиллуулах, хоёр байгууллагын хамтын ажиллагааг өргөжүүлж, шинэ түвшинд гаргах нь талаар харилцан санал солилцов.

Мөн Япон улсын Үндэсний архивын газарт зочлон очиж, баримт сэлбэн засах орчин үеийн дэвшилтэт технологи, баримтын хадгалалт, орчин нөхцөл, баримтыг цахимжуулж буй үйл явц, уншлагын танхимын үйл ажиллагаа, иргэдэд үзүүлдэг лавлагаа үйлчилгээ болон Сумида Хокусай, Принтинг музей, Тоёо Бунко номын сантай тус тус танилцсан.

Түүнчлэн Япон улсын Үндэсний архивын газрын ерөнхийлөгч Такео Катотой уулзаж, хоёр байгууллагын хооронд байгуулсан хамтын ажиллагааны санамж бичгийн хүрээнд хоёр орны түүх, соёлд холбогдох архивын баримтыг солилцох, архивын баримтын үзэсгэлэнг хамтран зохион байгуулах, туршлага солилцох, боловсон хүчин сургаж, бэлтгэх чиглэлээр хамтран ажиллахаар харилцан ярилцлаа.

Тус айлчлалын үеэр Япон улсын Үндэсний архивын газартай 2013 оноос хойш байгуулахаар харилцан ярилцаж байсан Хамтын ажиллагааны санамж бичгийг үзэглэсэн нь 2 улсын архивын байгууллага хоорондын хамтын ажиллагаа, харилцааг хөгжүүлэх эхлэлийг тавьж байгаагаараа онцгой ач холбогдолтой байлаа.

Эх сурвалж: Архивын ерөнхий газар