М.Цэвэлмаа дэлхийн шилдэг 40 гоо бүсгүйн нэг болов

 “Дэлхийн мисс-2019” тэмцээнд эх орноо төлөөлөн амжилттай оролцсон мисс М.Цэвэлмаа энэ сарын 23-нд эх орондоо ирэх гэж байна. Тэрбээр 12 дугаар сарын 14-нд Английн Лондон хотноо болсон 69 дэх удаагийн  “Дэлхийн мисс” тэмцээний шилдэг 40 орны гоо бүсгүйн нэг болсон юм.

“Зорилго бүхий гоо сайхны” шалгуурт мисс бүсгүйн санаачилсан элэгний өвчлөлийн эсрэг “Эрүүл Монгол – Эрүүл Дэлхий” төсөл шилдэг 10-т багтсан нь түүний онцлох амжилт болов. Үүгээрээ тэрбээр урьд өмнө нь тус тэмцээнд оролцож байсан монгол бүсгүүйчүүдийн амжилтыг шинэчлэн тогтоосон юм. Мөн М. Цэвэлмаа дэлхийн 130 орны гоо бүсгүйчүүдтэй өрсөлдөн “Авьяас” номинацид топ зургаа, “Head to head challenge Group” шалгуурт дөрвөн ялагчийн нэг, “Multimedia” төрлийн топ гуравт орсон амжилт гаргав.

Тэрээр Анагаахын шинжлэх ухааны үндэсний их сургуулийг эмч мэргэжлээр төгссөн, “Монголын сайхан бүсгүй-2018” уралдааны “Мөнгөн эрдэнэ”-ийн өргөмжлөлт оролцогч юм.