Үндэсний эрх чөлөө, тусгаар тогтнолоо сэргээн мандуулсны 108 жилийн ойг тохиолдуулан Төрийн дээд цол, одон медаль гардуулав

2019 оны 12-р сарын 29 өдөр, 13 цаг 34 минутад нийтэлсэн (Сэтгэгдэл үлдээх )
IMG_1494

Тулгар төрийн 2228 жил, Их Монгол Улс байгуулагдсаны 813 жил, Үндэсний эрх чөлөө, тусгаар тогтнолоо сэргээн мандуулсны 108 жил, Ардын хувьсгалын 98 жил, Ардчилсан хувьсгалын 30 жилийн ойг тохиолдуулан Монгол Улсын Ерөнхийлөгч Х.Баттулга зарлиг гаргаж, өнөөдөр Төрийн дээд цол, одон медаль гардууллаа.

Монгол Улсын Ардын эмч

Хүн амын эрүүл мэндийг сахин хамгаалах, мэс заслын шинэ арга технологиудыг практикт нэвтрүүлэх, хойч үеэ сурган хүмүүжүүлэх үйлсэд оруулсан өндөр хувь нэмрийг үнэлж, Монгол Улсын гавьяат эмч Чимэдцэеэгийн Пунцагт Ардын эмч цол хүртээв.

Мөн эрхэлсэн ажилдаа олон жил үр бүтээлтэй ажилласан аж үйлдвэр, эрүүл мэнд, хөдөө аж ахуй, барилга, боловсрол, соёл урлаг, нийгэм, үйлчилгээний салбарын нэр бүхий хүмүүст Монгол Улсын гавьяат цол хүртээлээ.

Аж үйлдвэрийн гавьяат ажилтан цолоор

  • “Дүнхэр хангай” ХХК-ийн зөвлөх инженер Самдангийн Эрдэнэбал,
  • “Дархан нэхий” ХХК-ийн захирал Эрдэнэдалайн Батсайхан,

Гавьяат агрономич цолоор

  • “Чагтай” ХХК-ийн захирал Жалсрайн Баярмагнай

Гавьяат багш цолоор

  • “Ховд” их сургуулийн хэл уран зохиолын багш Бавалын Даваадорж
  • Ерөнхий боловсролын “Гэрэлт ирээдүй” сургуулийн сургалтын менежер Ламжавын Олзвой
  • Сүхбаатар аймгийн боловсрол соёл урлагийн газрын ахмад ажилтан Осорын Сумьяагарав,
  • Удирдлагын академийн дэд захирал Дамирангийн Цэдэв,
  • Эрдмийн өргөө цогцолбор сургуулийн захирал Зоригтын Байгалмаа

Гавьяат барилгачин цолоор

  • “Эм си пи си жи ар” ХХК-ийн захирал Жанарын Батсайхан,
  • “Даваат” ХХК-ийн захирал Хыстаубайн Баян,
  • “Ордос” ХХК-ийн захирал Лхамсүрэнгийн Төмөр,

Гавьяат дасгалжуулагч цолоор

  • Монголын шатрын холбооны дасгалжуулагч багш Жамбалдоогийн Лхагва

Гавьяат жүжигчин цолоор

  • Үндэсний урлагийн их театрын ахмад хөгжимчин Жигдээгийн Цэцэгмаа

Гавьяат хуульч цолоор

  • Үндсэн хуулийн цэцийн орон тооны бус зөвлөх Чойжуурын Дашням

Гавьяат эдийн засагч цолоор

  • Ховд аймгийн Мэргэжлийн хяналтын газрын ахмад ажилтан Донидын Алтангэрэл

Гавьяат эмч цолоор

  • Улсын нэгдүгээр төв эмнэлгийн зүрх судасны эмгэг судлалын тасгийн эрхлэгч Батсүхийн Батболд
  • “Монос фарм трейд” ХХК-ийн зөвлөх Лувсангийн Гэрэлчимэг
  • Архангай аймгийн Нэгдсэн эмнэлгийн эхогийн эмч Будгианы Дэлгэрхангай
  • Хавдар судлалын үндэсний төвийн захирал Жигжидсүрэнгийн Чинбүрэн,

Урлагийн гавьяат зүтгэлтэн цолоор

  • Э.Цэрэвийн нэрэмжит Ойрад хөгжимт жүжгийн театрын уран сайхны удирдагч Цэрэвийн Амараа,
  • Улсын филармонийн Баянмонгол чуулгын хөгжмийн зохиолч Жамсрангийн Энхбаяр,

Үйлчилгээний гавьяат ажилтан цолоор

  • Дорнод аймгийн Улаан загалмайн хорооны дарга Бямбаагийн Ганболд
  • Онцгой байдлын ерөнхий газрын харьяа Нийслэлийн аврах 105 дугаар бригадын аврагч, ахлах ахлагч Халтарын Цогбадрах,
  • Үйлдвэрчний эвлэлийн байгууллагын ахмад ажилтан Даваацэрэнгийн Эрдэнэбат,

Хөдөө аж ахуйн гавьяат ажилтан цолоор

  • Дорноговь аймгийн Хатанбулаг сумын өндөр настан Цэвэлийн Дэмид,
  • Булган аймгийн Тэшиг сумын “Илэнхэн” ХХК-ийн зөвлөх Дамдинсүрэнгийн Цэен-Ойдов нарыг шагналаа.

Мөн галын аюулаас олон хүний амь нас аварсан Түргэн тусламжийн төвийн ажилчдад Шударга журам медаль гардуулж, баяр хүргэлээ.

Шударга журам медалиар

  • Нийслэлийн Түргэн тусламжийн төвийн дуудлагын жолооч Тавхийн Гүнтэвсүрэн
  • Нийслэлийн Түргэн тусламжийн төвийн их эмч Эрдэнэчулууны Одгэрэл нарыг шагнав.
ШАГНАЛ ГАРДУУЛСНЫ ДАРАА МОНГОЛ УЛСЫН ЕРӨНХИЙЛӨГЧ Х.БАТТУЛГА БАЯР ХҮРГЭЖ:

Эрхэм монголчууд аа,

Манлайлагчид, гавшгайчид аа

Тусгаар тогтнолоо сэргээн мандуулсан түүхт 108 жилийн ойг тохиолдуулан шинэ оны босгон дээр ажил үйлсээрээ манлайлсан, гавшгайчид сайчуудыг төрийн цол, одон медалиар шагналаа.

Шастины нэрэмжит Улсын Гуравдугаар Эмнэлгийн Ерөнхий мэс заслын зөвлөх эмч Чимэдцэеэгийн Пунцагт Монгол Улсын Ардын эмч цол олгож байна. Баяр хүргэе танд. Ч.Пунцаг гуай 1966 онд Баянхонгор аймгийн нэгдсэн эмнэлэгт мэс заслын эмчээр ажиллаж эхэлснээсээ хойш хүн ардынхаа эрүүл энхийн манаанд өнөөдрийг хүртэл 50 гаруй жил зогсож байгаа гавьяат эмч хүн юм. Тэрээр эмчилгээний хажуугаар эмнэл зүй, мэс заслын шинэлэг техник арга зүй, инновацыг нэвтрүүлэх, залуу эмч нарыг бэлтгэх ажилд одоо хүртэл хүчин зүтгэж, амжилт гаргасаар явна.

Түүнчлэн мөн эрүүл мэндийн салбарт олноо “Хавдрын Чинбүрэн” хэмээн танигдаж, элэгний мэс заслаараа дэлхийд монгол эмч нарын ур чадварыг хүлээн зөвшөөрүүлж яваа Хавдар судлалын Үндэсний төвийн захирал, манай улсын шилдэг залуу эмч Ж.Чинбүрэнд Монгол Улсын Хүний гавьяат эмч цол хүртээлээ. Баяр хүргэе танд. Манай улс хавдрын өвчлөл, нас баралтаараа дэлхийд тэргүүлж байгаа энэ хэцүү үед Монгол Улсад нэвтрүүлсэн элэгний болон нойр булчирхайн мэс засал, Монголд эмчлүүлэх боломжгүй өвчний жагсаалтыг бууруулж, хавдрын өвчлөл, шалтгаан нөхцөлтэй тэмцэж байгаа боон цаашид хийхээр зорьж олон ажилд тань амжилт хүсье.

Мөн “Дархан нэхий” хувьцаат компанийн гүйцэтгэх захирал Эрдэнэдалайн Батсайханд Монгол Улсын Аж үйлдвэрийн гавьяат цолыг олголоо. 1983 оноос хөдөлмөрийн гараагаа эхэлж, “Дархан нэхий” үйлдвэрийг 1999 оноос хойш удирдаж, дотоодын түүхий эдийг боловсруулах, нэмүү өртөг шингээх тал дээр чармайн ажиллаж байгаа таны гавьяа, таны хамт олныг үнэлж байгаа юм.

Монголын шатрын спортын ахмад зүтгэлтэн, дасгалжуулагч Жамбалдоогийн Лхагваа танд Монгол Улсын Гавьяат дасгалжуулагч цол олгож байна. Ж.Лхагваа 1965 оноос улсын шигшээ багийн тамирчнаар спортын гараагаа эхлүүлснээс хойш шатрын спортод хүүхэд залуучуудыг сургах, дурлуулах, дасгалжуулах ажилд хүчин зүтгэж, шавь нараас нь Сонирхогчдын дэлхийн аварга 3, сурагчдын дэлхийн аварга 1, Ази тивийн Залуучуудын аварга төрсөн. Мөн түүний шавь нар дотор Дэлхийн шатрын холбооны Олон улсын хэмжээний мастер цолтой 3, Их мастер цолтой 2, мастер цолтой 5 тамирчин байгаад бахархаж байна. Монголчууд эртнээс оюуны хөгжил, чадамж, өрсөлдөөнийг чухалчилж, шатрыг дээдлэн хүндэлж ирсэн уламжлалыг тасалдуулалгүй өргөж, дэлхийн хэмжээнд тамирчдыг бэлтгэн өрсөлдүүлж яваа Ж.Лхагваа багшид талархал илэрхийлье.

“Эм Пи Си Жи Ар” компанийн Ерөнхий захирал Жанарын Батсайханд Монгол Улсын Гавьяат барилгачин цол олголоо. 1983 оноос хойш Зам тээврийн барилгын салбарт техникч, инженер, төслийн удирдагч ажлуудыг тасралтгүй хийж ирсэн. Нийтдээ 4600 орчим км авто зам, 150 гаруй гүүрэн байгууламжийн зураг төслийг гүйцэтгэж, 3200 км авто замын Техник эдийн засгийн үндэслэлийг гаргаж, технологийн хяналтыг хийсэн, мэргэжлийнхээ чиглэлээр 40 орчим шинжлэх ухааны өгүүлэл бичиж нийтлүүлсэн шилдэг мэргэжилтэн юм.

Өнөөдөр онцлон дурдаж, гүн талархал илэрхийлэх ёстой эрхмүүдийг дурдъя. Сарын өмнөхөн 11 дүгээр сард Баянзүрх дүүргийн 12 дугаар хорооны нутаг дэвсгэрт угаартсан гэх дуудлагаар очсон Түргэн тусламжийн төвийн дуудлагын их эмч Эрдэнэчулууны Одгэрэл, жолооч Тавхийн Гүнтэвсүрэн нар нийт 7 хүний амь насыг гал түймрийн аюулаас зайлуулан аварч, анхны тусламж үзүүлж чадсан  байна. Хэрвээ амжиж галаас зайлуулаагүй бол гарцаагүй үхэх эрсдэл тулгарсан мөчид олон эрдэнэт хүний амь насыг аварсан явдалд нь Э.Одгэрэл, Т.Гүнтэвсүрэн нарт хувиасаа болон Монголын нийт иргэдийн нэрийн өмнөөс халуун талархал илэрхийлье. Та бүхэн бол иргэний үүргээ ухамсарласан, жинхэнэ энэрэх сэтгэл, чин зоригийн эзэд мөн. Энэ хоёр эрэлхэг иргэнд Шударга журам медаль гардууллаа.

Шагнагдагсад аа, гавшгайчид, манлайлагчид аа,

Та бүхний хөдөлмөр зүтгэл, амжилт бүтээл бол хүний амьдралын утга учир, нийгэмдээ, улс орондоо оруулах иргэн хүний хувь нэмэр гэдгийг олон түмэнд үлгэрлэж, сайн нөлөөлөл дуурайлыг түгээж яваа хүмүүс юм. Монголын төр гавшгайчид, гавьяатнуудаа ямагт тодруулж, урамшуулан шагнаж байх болно. Өнөөдөр би тэр үүргийг биелүүллээ.

Та бүхэнд дахин талархал илэрхийлье.

Мөнх тэнгэрийн ивээлээр сайн үйлс бүхэн дэлгэрч, Монгол Улс хөгжин бадрах болтугай” гэлээ.

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл үлдээх