Маргааш Бурхан багшийн их дүйчин өдөр

Маргааш зуны эхэн сарын шинийн 15 буюу Бурхан багшийн их дүйчин өдөр. XVII жарны “Хотол төгс” хэмээх төмөр хулгана жил буюу аргын тооллоор 2020 оны 6 дугаар 5-нд Бурхан багшийн Их дүйчин өдөр тохиож байгаа нь энэ буюу.

Их дүйчин өдрийг 2019 оны наймдугаар сард УИХ-ын чуулганаар Нийтээр тэмдэглэх баярын болон тэмдэглэлт өдрүүдийн тухай хуульд өөрчлөлт оруулж баталсан байна. Ингэснээр Бурхан багшийн Их дүйчин өдөр буюу зуны тэргүүн сарын 15-ныг нийтээр тэмдэглэх баярын өдөр болгон бүх нийтээр амрахаар болсон билээ. Уг хуулийн төслийг хэлэлцэх үеэр гишүүдийн зүгээс нийтээр тэмдэглэх баярын өдөрт өөрчлөлт оруулахдаа ёс суртахуунлаг өдөртэй болж, эх дэлхийгээ хайрлах, эцэг эх, үр хүүхэд гэр бүлээ энэрэн асрах, буян нүглээ эргэцүүлж, нигүүлсэнгүй байхад чиглэсэн онцолсон юм.

Эл өдрийг Бурхан Буддагийн эхээс мэндэлсэн, гэгээрлийн хутгийг олсон, нирваан дүрийг үзүүлсэн гурван үйл явдал давхацсан өдөр хэмээн хүндэтгэдэг бөгөөд Их дүйчин өдрийг Бурханы шашин дэлгэрсэн Азийн улс орнуудад баярын өдөр болгон тэмдэглэдэг уламжлалтай.

Энэ өдрийг Азийн төдийгүй Австрали, Европын бурхны шашинтнууд маш өргөн дэлгэр тэмдэглэдэг. Мөн НҮБ-аас “Эв нэгдлийн өдөр” болгон тэмдэглэдэг болсон байна.

Монгол оронд бурхны шашин гурван удаа дэлгэрсэн. Дүйчин өдрийн гол утга нь энэрэнгүй сэтгэлийг үүсгэн эелдэг зөөлөн үг хэлэлцэх өдөр юм. Энэ өдрийг эгнэшгүй буян хурааж, өөрийн тусыг огоорон бусдын тусыг санан амьтны амь таслахгүй, болж өгвөл махан хоол хэрэглэхгүй, эс өгснийг авахгүй, худал ярихгүй, муу үг хэлэхгүй, бусдыг хүндлэн уучилж тэмдэглэх учиртай аж.

Энэ өдөр Монголын сүсэгтний холбооноос дараах арга хэмжээг зохион байгуулахаар төлөвлөжээ.

• 05:00-07:00 Сүсэгтэн олонд нэг өдрийн сахил хүртээх ёслол болно (цахимаар)
• 09:30-10:30 Бурхан багшийн их дүйчэн өдөрт зориулсан ёслолын арга хэмжээ (МҮОНТВ-ийн 1 дүгээр сувгаар шууд дамжуулна)
• 10:50-11:00 Халамжийн цэцэрлэгийн нээлт (цахимаар)
• 10:30-12:30 Бурхан багшийн их дүйчэн өдөрт зориулсан тусгай хөтөлбөр (МҮОНТВ-ийн 1 дүгээр сувгаар шууд дамжуулна)
• 10:-17:00 Монголын бүх сүм, хийдүүдэд “Бурхан багшийн чого” хурал хурна
• 05:00-21:00 Бурхан багшийн их дүйчэн өдөрт зориулсан тусгай хөтөлбөр (Онлайнаар шууд дамжуулна)