Зоогийн газарт гарсан галыг унтраасан замын цагдааг олж талархал илэрхийлжээ

2020 оны 06-р сарын 12 өдөр, 11 цаг 29 минутад нийтэлсэн (Сэтгэгдэл үлдээх )
103668254_873447676509866_5662022074728967757_n_b

Тээврийн цагдаагийн албаны замын цагдаагийн газрын Баянзүрх дүүрэг дэх замын цагдаагийн хэлтсийн зохицуулагч, цагдаагийн дэслэгч У.Чойжанцан 2020 оны 06 дугаар сарын 10-ны өдөр 16 цаг 18 минутын орчимд Зүүн дөрвөн замын уулзварт хуваарийн дагуу албан үүргээ гүйцэтгээд ажлын дараа тус уулзварт ойр байрлах “Монжаргалант” ХХК-ийн зоогийн газарт үдийн цайндаа оржээ.

Энэ үед тус зоогийн газрын заалны хананд байрлах цахилгааны утаснаас гал авалцаж, үйлчлүүлж байсан иргэд болон үйлчилгээний ажилчдад аюултай нөхцөл байдал үүсэхэд цагдаагийн алба хаагч шуурхай арга хэмжээ авч, галын аюулгүй байдлын булангаас галын хорыг авч тухайн галыг тархахаас нь өмнө унтраажээ.

Зоогийн газрын ажилчид болсон үйл явдлын талаар байгууллагынхаа удирдлагад хэлэхэд галын аюулаас байгууллагын эд хөрөнгийг авран хамгаалсан үйлчлүүлэгч болон ажилчдыг эрсдэлээс хамгаалсан тухайн алба хаагчийг хайж олж талархал илэрхийлэхийг хүсч Тээврийн цагдаагийн албанд хүсэлт тавьсан байна.

Ийнхүү ард иргэдийнхээ аюулгүй байдлын төлөө иргэний үүргээ нэр төртэй биелүүлж “чимээгүй гавьяа” байгуулсан алба хаагчийг олж “Монжаргалант” ХХК-ийн удирдлагуудын зүгээс талархал, цэцгийн баглаа, мөнгөн шагналаар урамшуулсан байна.

Танд таалагдаж байвал LIKE хийгээрэй. Баярлалаа

АНХААРУУЛГА: Уншигчдын бичсэн сэтгэгдэлд ОНЦЛОХ.МН хариуцлага хүлээхгүй болно. ОНЦЛОХ.МН сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл үлдээх