Даян мэргэн Д.Дэмбэрэлсайхан: Үргэлж дэмжиж ирсэн Эрдэнэт үйлдвэрийнхэндээ баярлалаа

  “Эрдэнэт үйлдвэр” ТӨҮГ, нийгмийн хариуцлагынхаа хүрээнд хэрэгжүүлэн дэмжиж ирсэн спорт, урлагийн олон төсөл хөтөлбөрүүд нь тив дэлхий болон улс орны хэмжээнд алдар нэрээ цуурайтуулсан гавьяатнуудыг төрүүлсээр байна. Тус үйлдвэр үндэсний спортыг хөгжүүлэх, өв соёлоо хадгалан хамгаалах чиглэлээр хийсэн хөрөнгө оруулалт нь олон бахархам амжилт дагуулж буйн нэг тод жишээ нь Хангарьд спорт клубээс төрөн гарсан мэргэн харваачид юм. Монгол улсын Дархан мэргэн Ш.Даваахүү, Даяар дурсах мэргэн Л.Отгонбаяр, Даян мэргэн Ц.Баасанхүү, Б.Ёндон, Монгол Улсын мэргэн З.Сүлдболд нарын  Үндэсний сурын харваачдын түүчээ болсон бүхэл бүтэн нэгэн үе Эрдэнэт үйлдвэрээр овоглодог. Тэгвэл энэ жилийн баяр наадмаар улсын мэргэн Д.Дэмбэрэлсайхан 40 сумнаас 38 онож, даян мэргэний тоог нэмснээр Эрдэнэт үйлдвэр гуравдахь даян мэргэнээ өлгийдөв. Үндсэн ажлынхаа зэрэгцээ үндэсний сур харваагаар уйгагүй хичээллэж, Эрдэнэт үйлдвэрийнхээ нэрийг өндөрт өргөж, монгол төрийн наадамд хоёр дахь удаа цэц мэргэнээрээ магнайлсан Даян мэргэн Д.Дэмбэрэлсайханы амжилтыг өндрөөр үнэлж, Эрдэнэт үйлдвэр 2 өрөө амины орон сууцаар урамшууллаа. Өнөөдөр тэрээр Баян-Өндөр сумын Цагаанчулуут багт байрлах Эко хороолын шинэ сууцаа гэр бүлийн хамт  баяр хөөр дүүрэн гардаж авав.

     Энэ мөчид Даян мэргэн Д.Дэмбэрэлсайхан: “Эрдэнэт үйлдвэрт 11 дэх жилдээ ажиллаж байна. Манай  Хангарьд спорт клубээс 2009-2011 онуудад ажилтнуудынхаа эрүүл мэндийг дэмжих зорилгоор “Нийтийн биеийн тамир, чийрэгжүүлэлт” төслийг санаачилж, спортын 15-16 төрлийн дугуйлан секц хичээллүүлж эхэлсэн. Миний хувьд дугуйланд элсэхдээ монгол хүний хувьд үндэсний аль нэг спортоор хичээллэе гэж бодоод бөх барилдаж, морь унах нас нэгэнт өнгөрсөн юм чинь хамгийн боломжтой нь үндэсний сур харвааг сонгож байлаа. Ингэж үндэсний сурын спортыг сонирхож хичээллэсэн. Өмнө нь энэ спортын талаар мэдлэг, сонирхол багатай байв. Намайг энэ спорт руу хөтөлж, өнөөдрийн амжилтад хүрэх үндсийг Эрдэнэт үйлдвэрийн хамт олон, Хангарьд спорт клубын багш нар, харваачид маань л тавьж өгсөн. Мөн бэлтгэл сургуулилалт, тэмцээн уралдаанд явахад үргэлж дэмжиж, нийгмийн асуудлыг шийдэж ирсэн Эрдэнэт үйлдвэрийн үе үеийн удирдлагууддаа талархаж байна. Энэ бүхний үр шимээр манай Хангарьд спорт клубын харваачид улсын өндөр чансаатай тамирчид болж, том байр суурь эзэлж байна. Тиймээс энэ амжилт бол ганц минийх биш. Эрдэнэт үйлдвэрийн ажилтан ах эгч , багш нар, найз нөхөд, дүү нарын маань хамтын зүтгэлийн үр дүн гэж хэлмээр байна. Намайг дэмжсэн бүх хүнд баярлалаа” хэмээн хуваалцлаа.

М.Балжинням

Фото П.Батцэцэг

Эх сурвалж: erdenettoday.mn