“Ковид-19” өвчний нөхцөл байдал хүндэрч, эмнэлгүүдийн ачаалал ихсэж, хүний амь аврахад шаардлагатай тоног төхөөрөмж дутмаг байгаа энэ цаг үед олон улсын тээвэр зуучлалын “Симатай Монголиа” ХХК захирал Б.Энхзаяа, Клаймакс интернэшнл “Баян дөрвөлж” ХХК-ний захирал Н.Лхагвадорж нарын санаачилга, дэмжлэгтэйгээр Төв аймаг 20 ширхэг хүчилтөрөгч өтгөрүүлэгч аппараттай боллоо.
Хүчилтөрөгч өтгөрүүлэгч аппаратыг аймгийн ЭМГ-ын дарга С.Мөнхтуяад хүлээлгэн өгсөн бөгөөд сумд руу хуваарилах ажлыг зохион байгуулах юм. Уг аппарат нь 2021 онд үйлдвэрлэгдсэн шинэ загвар бөгөөд хүнд өвчтөнийг тээвэрлэх үед замдаа хүчилтөрөгчөө өгөөд явах боломжтой, зөөвөрлөхөд хялбар, авсаархан зэрэг олон давуу талтай гэдгийг онцоллоо. Дашрамд дурдахад, “Баян дөрвөлж” ХХК нь Батсүмбэр суманд 920 хүүхдийн сургуулийн барилгыг барьж байгаа юм.