“Мото спорт” эргүүл ажиллуулж эхэллээ

Нийтийн хэв журам хамгаалах, олон нийтийн аюулгүй байдлыг хангах албанаас санаачлан “Мото спорт” сонирхогчдын холбоодтой хамтран иргэдийг гэмт хэрэг, зөрчил, болзошгүй осол, гэмтлээс урьдчилан сэргийлэх чиглэлээр аялал, зугаалгын бүсэд энэ оны 06 дугаар сарын 21-нээс 08 дугаар сарын 25-ны хооронд хоёр сарын хугацаатай “Мото” эргүүлийг ажиллуулж эхэллээ.

Энэхүү арга хэмжээ нийслэлийн 9 дүүргийн нутаг дэвсгэр хариуцсан цагдаагийн байгууллага нэгэн зэрэг эхлүүлж байгаагаараа онцлог юм.

Иргэд амралт, зугаалгаар хөдөө орон нутагт зорчих, гол нуурын орчим амрах, өсвөр насны хүүхдүүд анги хамт олноороо аялж зугаалах явдал нэмэгддэг.

Энэ үед иргэдэд бага насны хүүхдүүддээ тавих хараа хяналтаа сайжруулах, согтууруулах ундаа хэтрүүлэн хэрэглэхгүй байх, байгаль орчиндоо бохирдол үүсгэхгүй, хоггүй цэвэр аялах талаар цагдаагийн байгууллагатай “Мото спорт” сонирхогчдын зарим холбоодтой нийгмийн хариуцлагын хүрээнд хамтран ажиллаж санамж, сэрэмжлүүлгийг хүргэн ажиллаж эхэллээ.