БНСУ дахь Хөдөлмөр, нийгмийн хамгааллын үйлчилгээний төв, БНСУ-ын ХАБЭАХЭГ-тай хамтран ажиллах гэрээ байгуулав

БНСУ дахь Хөдөлмөр Нийгмийн Хамгааллын Үйлчилгээний Төв нь 2023 оны 11 дүгээр сарын 17-ны өдөр БНСУ-ын Хөдөлмөрийн аюулгүй байдал, эрүүл ахуйн хэрэг эрхлэх газартай “Хамтран ажиллах гэрээ”-г шинэчлэн байгууллаа.

Гэрээнд гарын үсэг зурах ажиллагаанд БНСУ дахь Хөдөлмөр, нийгмийн хамгааллын үйлчилгээний төвийн даргын албан үүргийг түр орлон гүйцэтгэгч Н.Буянхишиг, Хөдөлмөр, нийгмийн хамгааллын тасгийн мэргэжилтэн Д.Үнэнбат, БНСУ-ын Хөдөлмөрийн аюулгүй ажиллагаа эрүүл ахуйн хэрэг эрхлэх газрын Олон улсын хамтын ажиллагааны төвийн дарга Ли Жэ Ван, хэлтсийн дарга Чой Жун Хү болон албаны бусад хүмүүс оролцов.

Талууд 2020 онд байгуулсан хамтран ажиллах гэрээгээ дүгнэж, үр дүнг хэлэлцээд шинэчилсэн гэрээний хүрээнд хийх ажлуудаа ярилцаж, санал солилцлоо. Хоёр тал Солонгосын төвийн бүс, дагуул хотууд, Үлсан, Инчонд байрлах сургалтын чадамжийн төвүүдэд Монгол Улсын гэрээт ажилчдад аюулгүй ажиллагааны сургалт хийх, ХАБЭАХЭГ–аас зохион байгуулж буй 3-5 хоногийн аюулгүй ажиллагааны сургалтанд төвийн мэргэжилтнүүдийг хамруулах, сургалт хийх эрх олгох, виртуал сургалт хийх, материаллаг бааз, гарын авлага, видео бичлэг зэргээр хангах ажлуудыг хийх юм. Сургалт, арга хэмжээг БНСУ-ын Хөдөлмөр эрхлэлт, хөдөлмөрийн яам болон KOICA–аас хэрэгжүүлж буй ODA төсөлтэй уялдуулж, хамтран зохион байгуулахаар төлөвлөж байна.

БНСУ-ын Хөдөлмөрийн аюулгүй байдал, эрүүл ахуйн хэрэг эрхлэх газар нь 2000 гаруй мэргэжлийн өндөр түвшинд бэлтгэгдсэн хүний нөөцтэй, хөдөлмөрийн аюулгүй ажиллагаа, эрүүл ахуйн чиглэлээр үйл ажиллагаа явуулж дотоод, гадаадын нийт ажилчдыг үйлдвэрлэлийн осол бэртэлд өртөхөөс урьдчилан сэргийлэх цогц бодлогыг хэрэгжүүлэн ажилладаг төрийн байгууллага юм.

БНСУ-ын Засгийн газар хөдөлмөрийн зах зээлд үүсээд буй ажиллах хүчний хомсдлоос шалтгаалан илгээгч 16 улсаас авах гэрээт ажилчдын квотыг 2023 онд нийт 110000 болгож нэмэгдүүлсэн. Үүний дотор Монгол Улсаас ирэх хөдөлмөрийн гэрээт иргэдийн энэ жилийн квот 1840 болж нэмэгдээд байна.