Шинэ уран бүтээл: МУГЖ С.Жавхлан “Монгол тансаглал”

Үг, ая Самандын Жавхлан

”Монгол тансаглал”

Сүргийн хишигтэй дэндүү баян нутагтаа

Сүүний үнэртэй ариухан өргөөндөө

Хийцтэй цайгаа тогоонд боргилуулаад

Хөөрхий ээж минь аягалаад өгдөгсөн

Дахилт:

Ай хө, ай хө

Ээжийн чанасан цайны амтыг нь ээ

Най хө

Өвгөдөөс авшигтай тэнгэрлэг гэгээн хоймортоо

Өөдөсхөн жаалхан биднийгээ тойруулчхаад

Уур савссан махнаас галдаа дээжлээд

Ухаант аав минь хуваагаад өгдөгсөн

Дахилт:

Ай хө, ай хө

Хуваагаад өгсөн махны шимтэйг нь ээ

Най хө

Үлгэр туульс, хаадын алтан шашдирыг

Үдэш бүрийд өвөө минь хуучилдагсан

Хайрсан бин дээр зузаан өрөм тавиад

Хайлган эмээ минь эвийлээд өгдөгсөн

Дахилт:

Ай хө, ай хө

Эмээгийн холисон тосны үнэрийг нь ээ

Най ай хө

Нар шингээсэн ааруул ээзгий амин дэмтэй

Насны даатгал идээ шүүс нь эм тантай

Тараг айраг хоормог охь шидтэй

Тоолшгүй ихийг бидэндээ заяаждээ

Дахилт:

Ай хө, ай хө

Агуу Монголын тансаглал мину зээ

Ай ай хө

Агуу Монголын тансаглал мину зээ!

Сэтгэгдэл үлдээх