Гадаад улс руу аялах нэрийдлээр иргэдийг залилж буй хэрэг нэмэгдэж байна

Сүүлийн жилүүдэд манай улсын иргэд өвлийн улиралд, ялангуяа шинэ оны үеэр БНХАУ, Тайланд, Вьетнам зэрэг Зүүн өмнөд Азийн орнуудад аялал жуулчлалын зорилгоор зорчих нь нэмэгдэж байна. Үүнтэй холбоотойгоор цахим орчинд гадаад улсад аялах сонирхолтой иргэдийн хэрэгцээнд тулгуурласан залилах гэмт хэрэг үйлдэгдэх эрсдэл нэмэгдэж байгаа юм.
Тухайлбал, өчигдөр “Бали арал руу аяллаар явахаар 13 хүн нийт 36 сая төгрөг шилжүүлсэн боловч нэг ч хүний нислэгийн тийзийн захиалга баталгаажаагүй” гэх гомдол мэдээлэл бүртгэгдэж, холбогдох шалгалтын ажиллагааг явуулж байна.
Залилагч этгээдүүд гадаад улс руу хямд зардлаар аялах хүсэлтэй иргэдийг онилон, цахим орчинд таатай нөхцөл бүхий, хэт хямд аяллын багц санал болгож, улмаар сонирхсон иргэдтэй гэрээ байгуулсан мэт харагдуулан, уг гэрээг халхавч болгон залилангийн гэмт хэрэг үйлдэж байгаа тохиолдол цөөнгүй байна.
Иймд иргэд та бүхэн сонор сэрэмжтэй байж, аяллын үйлчилгээ үзүүлэгч байгууллагын албан ёсны зөвшөөрөл, тийзийн баталгаажуулалт, төлбөрийн нөхцөлийг сайтар нягталж, энэ төрлийн залилах гэмт хэрэгт өртөж, эд хөрөнгөөрөө хохирохоос урьдчилан сэргийлэхийг анхааруулж байна.