Монгол Улсын 4 дэх Ерөнхийлөгч Ц.Элбэгдорж: Монголын ард түмнийг хайрлаж яваарай

Монгол Улсын Ерөнхийлөгч Х.Баттулга тангараг өргөсний дараа Монгол Улсын 4 дэх Ерөнхийлөгч  Ц.Элбэгдорж сэтгүүлчдэд хандан үг хэллээ. Тэрээр хэлсэн үгэндээ :

“Намайг төрийн тэргүүнээр залж, итгэл хүлээлгэж, хамтарч дэмжиж ажиллласан ард түмэндээ хязгааргүй талархаж байна. Би тостой бээлийтэй  засварчин явсан. Аравдугаар ангиа төгсөөд засварчин хийж байлаа. Намайг дэмжиж ажилласан олон мянган хамтрагчиддаа талархаж байна. Би эх орондоо тангараг өргөж, байлдаж явсан. Намайг Зэвсэгт хүчний ерөнхий командлагчаар хүлээн авч, хамтран зүтггэсэн цэргийнхэн, зэвсэгт хүчнийхэн, онцгой, цагдаагийн алба хаагчид та бүхэндээ талархаж байгаагаа илэрхийлье. Тангараг өргөсөн хүмүүсээ хайрлаж яваарай.

Долдугаар сарын 1-нээс Эрүүгийн хууль хэрэгжиж эхэлсэн. Маш олон хүмүүс төрийн уучлал, өршөөл үзүүлж, нийт 1575 хүн хорих байгууллагаас гарсан. Тэдгээрийн дотор 89 эмэгтэй байсан. Үүн дээр өнөөдөр би 11 эмэгтэй, долоон хүүхдэд уучлал үзүүлсэн.

Эрүүгийн хуулийн хүрээнд алдаж эндсэн аавын хүү, ээжийн охид бүгдэнд нь хуулийн хөнгөлөлт очсон.

Төрийн алба хаагчид Монголын ард түмнийг хайрлаж яваарай. Би сайн ажилласан бол ард түмний хүч, хэрэв би муу ажилласан бол миний муугийнх юм шүү. Намайг дэмжиж ажилласан Ерөнхийлөгчийн Тамгын газрынхандаа талархаж байна. Монгол бол нэг баг юм. Энэ багийн төлөө, Монголын сайн сайхны төлөө өөрт байгаа бүхнийг зориулах болно. Та бүхэн сайхан наадаарай” гэв.