Алга болсон охиныг эсэн мэнд олжээ

Цагдаагийн байгууллагад Өмнөговь аймгийн Ханхонгор сумын Жаргалант багийн нутаг Даланзадгад сумын төвөөс урд зүгт 20 км зайтай орших Дундцагаан гэх газраас 2023 оны 05 сарын 30-ны өдрийн 19 цагийн үед 1 ой 6 сартай охин алга болсон байна гэх дуудлага, мэдээлэл бүртгэгдсэн.

Тус аймгийн Онцгой байдлын газраас 15, Ханхонгор сумын Онцгой комиссоос 20, Цагдаагийн газраас 46 алба хаагч, 20 тээврийн хэрэгсэлтэйгээр тухайн газрын ойр орчим, түүнээс гадагш 10 орчим километрийн радиуст самналт хийж эрэн хайх ажиллагааг зохион явуулж 2023 оны 05 сарын 31-ний өглөө 09 цаг 40 минутад алга болсон охиныг эсэн мэнд олж тогтоолоо.

Иргэд Та бүхэн бага насны хүүхэддээ тавих хараа хяналтаа сулруулахгүй байж, тэднийг болзошгүй осол, гэмтлээс урьдчилан сэргийлэхийг цагдаагийн байгууллагаас зөвлөж байна.