Дуучин С.Бичүү ээждээ зориулж “дуун суварга” бүтээлээ

Олон жилийн турш тасралтгүй уран бүтээл туурвина гэдэг уран бүтээлчээс асар их тэвчээр, хөдөлмөр, зүтгэл шаарддаг. Ялангуяа чөлөөт уран бүтээлчийн хувьд тогтмол уран бүтээл туурвих нь амаргүй сорилт байдаг.

Поп дуучин С.Бичүү 22 жилийн өмнөөс урлагийн тайзнаа дуулж эхэлсэн бөгөөд энэ хугацаанд сонсогч, фенүүддээ олон уран бүтээл хүргэсээр иржээ. Тэрбээр энэ удаад бурхан болсон ээждээ зориулан “дуун суварга” бүтээж, сэтгэлийн гүнээс ургасан шинэ уран бүтээлээ олонд хүргээд байна.

Дуучин С.Бичүү “Ээжгүй энэ орчлон ямар эх эзгүй, хоосон орон зай байдгийг би ойлгосон. Энэ дуугаа бурхны оронд байгаа ээждээ зориуллаа” хэмээн сэтгэгдлээ хуваалцжээ.

Тэрбээр өмнө нь ч ээжийн тухай уран бүтээл туурвиж байсан бөгөөд энэ нь ээждээ зориулсан хоёр дахь бүтээл болж байгаа аж. Ийнхүү дуучин С.Бичүү ээжийн хайр, дурсамжийг хүндэтгэн мөнхжүүлэх зорилгоор шинэ уран бүтээлээ сонсогчдодоо өргөн барилаа.