Оюутан цэргүүд энэ сарын 13-15 нд тангаргаа өргөнө

Монгол улсын ерөнхийлөгч, ЗХ-ний ерөнхий командлагч Ц.Элбэгдоржийн санаачилга, Засгийн шийдвэрээр гурав дахь жилдээ хэрэгжиж буй “Оюутан цэрэг” хөтөлбөр энэ жил цар хүрээ нь улам өргөжин тэлж Улаанбаатар, Ховд, Дорнод аймгуудад нэгэн зэрэг хэрэгжиж байгаа бөгөөд энэ жил 1000 залуус “Оюутан цэрэг” хөтөлбөрт хамрагдан эр цэргийн албыг хааж байна.

“Оюутан цэрэг” хөтөлбөрт энэ жилийн тухайд Улаанбаатар хотод 750 оюутан, Эх орны баруун хязгаар Ховд аймагт 150, Дорнод аймагт 100, нийт 1000 оюутан өөрийн сайн дураар хамрагдсан байна. Улаанбаатар хотын нийт 19 их дээд сургуулийн эдгээр 750 оюутан Батлан хамгаалахын их сургуулийн цэргийн нэгдсэн сургалтын төвд бага хугацаанд их зүйл сурахын төлөө албаа нэр төртэй хааж байна. Жилээс жилд “Оюутан цэрэг” хөтөлбөрт хамрагдан цаг хожиж алба хаах хүсэлтэй залуусын тоо нэмэгдсээр байна.

Хоёр жилийн өмнө оюутан цэрэг хөтөлбөрийг Зэвсэгт хүчний харьяа анги байгууллагууд хариуцан хэрэгжүүлж байсан бол энэ жил Батлан хамгаалахын их сургууль дангаараа бие даан өөрийн сургалтын төвдөө ийнхүү хэрэгжүүлж нийт 120 гаруй багш, офицер ахлагч, ажилтан алба хаагчид тогтсон хөтөлбөр төлөлвлөгөөний дагуу алба үүргээ гүйцэтгэж байгаа бөгөөд сургалтын нийт 12 цэгт оюутан цэргүүдэд мэдлэг чадварыг олгож байна.

Мөн ОХУ-д Ерөнхий цэрэг, Хими,  автын инженер, Артиллер, Биеийн тамирын багш зэрэг мэргэжлүүдийг эзэмшсэн залуухан офицерууд сургалтын цэг бүрийг хариуцан явуулж байгаа нь Батлан хамгаалахын их сургуулийн багш нарын нэгэн ололттой тал юм.

Батлан хамгаалахын их сургууль дээрхи хөтөлбөрийн бэлтгэл ажлыг өнгөрөгч 4 сараас эхлэн 6-р сарын 15-ны хооронд эрчимтэй явуулж бага хугацаанд олон бүтээн байгуулалтын ажлуудыг өрнүүлжээ. Цэргүүдийн ор дэр, цагаан хэрэглэлээс эхлээд майхны гадаах гэрэлтүүлэг, зам талбай бүхнийг цоо шинээр байгуулсан нь тус хөтөлбөрийг хэрэгжүүлэхэд өндөр ач холбогдол өгч ажилласан байна.

Засгийн газар, Батлан хамгаалах яамнаас “Оюутан цэрэг” хөтөлбөрт зориулан 500 хүн хооллох заал, халуун ус, жагсаалын талбай, гүний худаг, задгай театр, гар нүүрийн угаалтуур зэрэг оюутан сонсогчдын сургалтын болоод, амьдрах орчныг бүрдүүлсэнээрээ тус сургалтын төвийн үйл ажиллагаанд оруулсан томоохон хөрөнгө оруулалт болжээ.

Буудагч, тасгийн даргын мэргэжил эзэмшсэн 1000-н оюутан энэ сарын 13-аас 15-ны өдрүүдэд эр цэргийн тангаргаа өргөн халагдана.

Эх сурвалж: Батлан хамгаалах яам