2016 оны нэгдсэн төсөвт тодотгол хийхдээ тэвчиж болох бүх зардлыг танаж, шаардлагагүй ажил үйлчилгээ хөтөлбөрийг хойшлуулна

Өчигдөр Монгол Улсын Ерөнхий сайд Ж.Эрдэнэбат, Сангий сайд Б.Чойжилсүрэн нар төсөв, санхүүгийн өнөөгийн байдал болон цаашид авч хэрэгжүүлэх арга хэмжээний талаар хэвлэлийнхэнд мэдээлэл хийсэн.

2016 оны нэгдсэн төсвийн алдагдал нэмэгдэж, энэ хэрээрээ цааш явсаар байвал оны эцэст алдагдлын хэмжээ ДНБ-ий 21 хувиас хэтрэх аюул байгаа учраас төсвийн тодотголыг Сангийн яам боловсруулж байгаа юм байна. Мөн Ерөнхий сайд Ээлжит бус чуулганыг яаралтай зарлаж, 2016 оны төсвийн тодотголыг хэлэлцэх хүсэлтийг УИХ-д хүргүүлжээ.

Ерөнхий сайд хэлэхдээ эдийн засгийн хүндрэлээс гарах хөтөлбөрийг боловсруулж байгаа бөгөөд Ээлжит бус чуулганаар 2016 оны төсвийн тодотголтой хамт өргөн барьж хэлэлцүүлнэ гэв. Төсвийн орлого төлөвлөсөн хэмжээнээс 1.8 их наяд төгрөгөөр тасраад байгаа. Тиймээс 2016 оны нэгдсэн төсөвт тодотгол хийхдээ тэвчиж болох бүх зардлыг танаж, шаардлагагүй ажил үйлчилгээ хөтөлбөрийг хойшлуулна гэдгийг Ерөнхий сайд онцолсон. Ингэхдээ төрийн өндөр албан тушаалтнуудын болон шаардлагатай тохиолдолд өндөр цалинтай зарим төсөвт байгууллагын ажилчдын цалинг бууруулна гэдгийг хэллээ. Мөн хүүхдийн мөнгө болон халамжийг зөвхөн зорилтот бүлгийнхэнд олгох юм байна. Зөвхөн олсон орлогынхоо хэмжээнд зарлага гаргаж, төсвийн захилга баттай, зохистой байдлыг баримталж ажиллана. Мөн цалин, тэтгэвэр нэмнэ гэхээс илүү эдийн засгийн хүндрэлийн үед иргэн бүрээ ажилтай, орлоготой байлгах бодлого хэрэгжүүлэхийг тэргүүнд тавина гэдгийг Ерөнхий сайд онцлов. Мөн төсвөөс гадуур  4-5 төсөвтэй байхгүй, нэгдсэн нэг төсөвтэй явж зардлыг байж болох хэмжээнд бууруулна.