СТА Г.Золбоот, жүжигчин Х.Баярмаа нар “багшлав”

“Яг түүн шиг” шоугаар жүжиглэх, дуулах авьяасаа нээсэн загвар өмсөгч С.Сарнай анхныхаа дэлгэцийн бүтээлд тогложээ.

Түүнийг  жүжигчин С.Өлзийхүүгийн “Хас урдан” студи, “Шүүдэр” продакшны хамтын бүтээл “Галзуу зугаалга” кинонд тоглоход хамтдаа натурт гарсан чадварлаг жүжигчин СТА Г.Золбоот, жүжигчин Х.Баярмаа нар жүжиглэх туршлагаа хуваалцан “багшилжээ”. С.Сарнай зун Богд уулын Хүрхрээгийн аманд натурт гарахдаа жүжигчин Г.Золбооттой хамт авахуулсан зурагтаа “Мундагуудаас их юм сурч байна даа” хэмээн тайлбар бичин постолж байсан нь ийм учиртай аж.

Их сургуулийн нэг ангийн 7 найз ангийнхаа Мишээлийн төрсөн өдрийг тэмдэглэхээр аялалд гарна. Гэтэл Мишээлийн найз залуу Билгүүн зугаалганд явсангүй. Хүн бүхний төлөө санаа тавьж явдаг, ажилсаг, халамжтай ч охидын анхаарлыг татаж чаддаггүй Тайванаа найзуудаа хотоос зайдуу орхигдсон байшинд дагуулан иртэл тэнд залуусыг санаандгүй аюул хүлээж байжээ.

“Галзуу зугаалга” кинонд  америк зураглаач Крис Мартин ажиллаж, 4k форматаар зургаа авчээ.

Энэ кинонд эрэмгий, адтай бүсгүй Хулангийн дүрд тоглосон жүжигчин Х.Баярмаа кинондоо тоглож дуусаад Америкт сургуульдаа үргэлжлүүлэн сурахаар одсон бол, Билгүүний дүрд тоглосон загвар өмсөгч Э.Энхболд Хонконгод болж буй “Азийн топ модель” тэмцээнд оролцохоор явжээ.

Залуусын сэдэвт галзуу бүтээл “Галзуу зугаалга”-ын нээлт 9-р сарын 23-нд болох агаад цахим ертөнцөд хамгийн олон дагагчтай залуу оддын цугларалт болох аж.