Өнөөдөр Уушигны хатгалгаатай тэмцэх Дэлхийн өдөр

Дэлхий дахинаа 2009 оноос эхлэн жил бүрийн 11 сарын 12-ны өдрийг “Уушгины хатгалгаа өвчинтэй тэмцэх дэлхийн өдөр” болгон тэмдэглэсээр иржээ. Гол зорилго нь уушгины хатгалгаа өвчин, сэргийлэх боломжтой хүүхдийн өвчлөл, эндэгдлийг бууруулахад эцэг эх, олон нийтийн оролцоог нэмэгдүүлэх, байгууллага хамт олны анхаарлыг хандуулах, ухуулга нөлөөллийн ажлыг эрчимжүүлэхэд оршдог.

2016 онд уг өдрийг “АМЛАЛТАА БИЕЛҮҮЛЦГЭЭЕ – ХАТГАЛГААНЫ ЭСРЭГ ХАМТДАА“ уриан дор дэлхий нийтээрээ тэмдэглэж байна.

Уушгины үрэвсэл буюу хатгалгаа өвчин нь дэлхий дахинд 5 хүртэлх насны хүүхдийн өвчлөл, нас баралтын голлох шалтгааны нэг болж байгаа бөгөөд жил бүр 1.4-2 сая хүүхэд уг өвчний улмаас эндэж байна.

Манай улсад амьсгалын тогтолцооны шалтгаант нас баралт 0-1 хүртэлх насны хүүхдийн эндэгдлийн дотор төрөх тойрны эмгэгийн дараа 2 дугаар байранд, 1-4 насны хүүхдийн эндэгдлийн эхний байрыг эзэлсээр байна.

Хүүхдийн эрүүл мэнд, эсэн мэнд амьдрахуйд сөргөөр нөлөөлж буй хүчин зүйлс

• Хүн амын амьдралын түвшний хэт ялгаатай байдал, хот хөдөөгийн ялгавартай байдал, төвөөс хэт алслагдсан байрлал, дэд бүтэц дорой, яаралтай тусламжийн бэлэн байдал хангалтгүй байдал

• Агаарын ба хөрсний бохирдол, ариун цэвэр эрүүл ахуй, усан хангамжийн дорой байдал
• Гэр бүл эцэг эхийн хүүхэд асран хамгаалах дадал зуршил, эмнэлгийн тусламж хайх мэдлэг дутмаг байгаа нь хүүхдийн эрүүл мэнд, тэдний эсэн мэнд амьдрахад мэдэгдэхүйц сөрөг нөлөө үзүүлж, хүүхдийн эрүүл мэндийн тусламж үйлчилгээний хүртээмжийг бууруулж байна.

ЭХЭМҮТ нь НҮБ-ын Хүүхдийн сангийн дэмжлэгтэйгээр “Эх хүүхдийн эрүүл мэнд – Эх орны эрхэм баялаг” цуврал нэвтрүүлгийг доорх сэдвүүдээр бэлтгээд байгаа ба Скаймедиа (55 мянга гаруй хэрэглэгчтэй), Юнивишний (100 мянга гаруй хэрэглэгчтэй) хэрэглэгчдэд хүргэхээр төлөвлөөд байна. Үүнд:

1. Уушгины хатгалгаа өвчнөөс сэргийлье
2. Агаарын бохирдол ба хүүхдийн өвчлөл
3. Нярайн анхны тэврэлт
4. Нярайн эрүүл эмгэгийн зааг, шарлалт
5. Ахуйн осол гэмтлээс сэргийлье
6. Түлэгдэлтээс сэргийлье

Скаймедиа, Юнивишн зэрэг байгууллагуудтай “Эрүүл мэнд-Эрхэм баялаг” цуврал нэвтрүүлгийг байршуулах хамтын ажиллагааны санамж бичиг зурах үйл ажиллагааг 2016 оны 11 сарын 10-ны өдөр ЭХЭМҮТ-д зохион байгууллаа.