Хан-Уул дүүргийн Засаг дарга Ж.Алдаржавхлан дүүргийнхээ 3 ихэр хүүхэдтэй болсон залуу гэр бүлд хүндэтгэл үзүүллээ

Хан-Уул дүүргийн иргэдийг Монголын Аж үйлдвэрийн тулгын чулууг тавьсан түүхэн гавьяагаар нь онцолдог. Өдгөө 56.418 өрхтэй 195.539 мянган хүн амтай Хан-Уул дүүрэгт 2019 онд 5113 хүүхэд мэндэлж, 1110 иргэн гэрлэлтээ батлуулсан байна.

Тэгвэл нийслэлийн Хан-Уул дүүрэгт гурван ихэр төрсөн тохиолдол дөрөв байна. Хорвоод ихэр төрнө гэдэг тун онцгой хувь тохиол. Дан ганц тухайн айл өрхөөр зогсохгүй аль ч улсын түүхэнд тодоор бичигдэж үлддэг билээ. Тухайлбал Монголын хамгийн өндөр настан 3 ихэр буюу Д.Дэнсмаа, Д.Гүнсмаа, Д.Цэрмаа нар өдгөө 90 насыг зооглон Хан-Уул дүүргийн 16 дугаар хороонд энх тунх амьдарч байна.

Тэдний үргэлжлэл манай дүүргийн 15 дугаар хороонд 2011 оны 11 дүгээр сард Э.Эрдэнэбаатар, Б.Болортуяа нарын гэр бүлд Э.Манлай, Э.Магнай, Э.Марал нар мэндэлсэн бол 19 дүгээр хороонд Д.Ариунбилэг, Д.Ундралбилэг, Д.Өрнөхбилэг нар 2018 оны 07 дугаар сард мэндэлжээ.

Үүний дараагаар дүүргийн хүндэт иргэд ихрүүдийн үргэлжлэл болж хамгийн бяцхан 3 ихэр маань энэ оны 4 дүгээр сарын 03-ны өдөр дүүргийн 1 дүгээр хорооны иргэн М.Нанзаддорж, О.Сэлэнгэ нарын гэр бүлд аз жаргал, баяр хөөр авч ирээд удаагүй байна.

Аав, ээж, ахан дүүсийнхээ аз жаргалын гол түлхүүр болон ирсэн Н.Энэрлэн, Н.Мөнхлөн, Н.Энхлэн нарт дүүргийн Засаг дарга Ж.Алдаржавхлан Монгол Улсын төрсний гэрчилгээ, гарын бэлэг өгч хүндэтгэл үзүүллээ.