АСЕМ-ын Залуучуудын чуулганд оролцогчдыг бүртгэж байна

АСЕМ-ын дээд түвшний 11 дэх уулзалтын хүрээнд зохион байгуулагдах 9 дагалдах арга хэмжээний нэг “АСЕМ-ын Загвар чуулган 2016” Улаанбаатар хотноо ирэх 7 дугаар  сард  болох юм. Монголын Залуучуудын Холбоо нь тус чуулганыг зохион байгуулж байгаа бөгөөд  оролцогчдыг 2016. 03. 14-өөс эхлэн бүртгэж эхэлжээ.

Тус чуулган нь дээд түвшний уулзалтынхаа өмнө зохиогддог том хэмжээний залуучуудын хуралдаан бөгөөд их, дээд сургуулийн оюутнуудад АСЕМ-ын дээд түвшний уулзалтын талаар ойлголт мэдээлэл өгөх, оюутан залуусыг идэвх сонирхол, оролцоог нэмэгдүүлэх зорилготой улс төрийн үлгэрчилсэн уулзалт юм.

Энэхүү үргэлчилсэн хуралдаан нь хоёр үе шаттай. Эхнийх нь чуулган болохоос 1-2 сарын өмнө оюутнууд онлайнаар бүртгүүлэн хамтран ажиллах буюу багт хуваагдан судалгаа хийж, тодорхой жишээн дээр ажиллана. Дараа нь  үндсэн хуралдаан болж, нүүр тулан ярилцах, асуудал дэвшүүлэх хэлбэрээр зохиогддог.

Чуулганд оролцогчдыг энэ сарын 17-ны өдрийг дуустал бүртгэх бөгөөд myf.mn сайтаар болон МЗХ-ны төв байранд өөрийн биеэр ирж бүртгүүлэх боломжтой юм байна. Бүртгүүлэх иргэнд 18-30 насны Монгол Улсын иргэн байх, мөн оюутан байх, англи хэлний бичгийн болон ярианы чадвар өндөртэй байх гэх зэрэг хэд хэдэн шаардлагыг тавьж байгаа аж.