“Зика” вирус микроцефаль буюу тархи хэт жижигрэх гажиг үүсгэдэг нь нотлогджээ

1947 онд Уганда улсын Зика нэрт ойгоос анх сармагчинд илэрч өнгөрсөн онд Бразил улсад тархаж, одоогоор Америк тивийн 30 гаруй оронд  дэгдээд байгаа “Зика” вирусын халдвар нь микроцефаль хэмээх тархины гажиг болон бусад ноцтой төрөлхийн гажгийг үүсгэдэг болох нь АНУ-ын Өвчнийг хянах, урьдчилан сэргийлэх төвийн /АӨХУСТ/ судалгаагаар нотлогдсон тухай анагаах ухааны “New England” сэтгүүлийн лхагва гарагийн тусгай дугаарт нийтэлсэн байна. “Энэ судалгаа нь “Зика” вирусын тархалтыг зогсоож, энэ асуудлыг шийдвэрлэхэд эргэлтийн үе ирснийг харуулж байна. Энэ вирус микроцефаль хэмээх тархины гажиг үүсгэдэг болохыг бид нотоллоо” гэж дээрх төвийн захирал Том Фреиден мэдэгджээ.“Бидэнд олж мэдээгүй зүйл олон байгаа ч “Зика” вирус нь микроцефаль хэмээх тархины гажиг үүсгэдэг гэдэгт эргэлзэх зүйлгүй. Энэ вирус сэтгэцийн эмгэг үүсгэдэг эсэхийг одоо бид судалж байна” гэж тус төвийн захирал ярьжээ.