МСНЭ-ээс сэтгүүлч Х.Наранжаргалыг “Цагаан жагсаалт”-д нэр дэвшүүллээ

Монголын Залуучуудын Холбоо өнгөрсөн оны 3-р сараас эхлэн Хулгайчгүй Монгол хөдөлгөөнийг орон даяар эхлүүлсэн. Мэдээж хэн нэгний захиалгаар бус залуучуудын санаачлагаар, иргэдийн дэмжлэгээр хийгдэж байгаа уг хөдөлгөөнийг хэвлэл мэдээллийн хэрэгслүүд дэмжсээр ирсэн юм. Үнэн бодит мэдээллийг ард түмэнд хүргэх ёстой хэвлэлийн байгууллага үүргээ сайн биелүүлж ирсэнд залуучууд, иргэд талархалтай хандаж байна. 4-р сарын 7 нд зохион байгуулагдсан “Гутлын жагсаал”, “100 хар үйл явдал”-ыг зарлахад орон даяар бүх хэвлэл мэдээллийн хэрэгслүүд шууд болон шууд бусаар мэдээллийг түгээж хамтын хүч ямар хүчтэй болохыг төрийн хулгайч нарт  харин ч нэг мэдрүүлээд өгсөн. Тэгвэл Монголын Залуучуудын Холбоо удахгүй 5-р сарын 20 “Залуу уран бүтээлчдийн улсын III зөвлөгөөн”-ийг зохион байгуулж “хар жагсаалт”-д орогсдыг албан ёсоор зарлах бол, 6-р сарын 11-нд “Цагаан жагсаалт”-д орсон  хүмүүстэй хариуцлагын гэрээ байгуулах юм байна. Энэхүү хариуцлагатай үйл хэргийг Монголын сэтгүүлчдийн нэгдсэн эвлэл дэмжиж буйгаа илэрхийлээд цаашид хэвлэл мэдээллийн байгууллагууд хамтарч ажиллана гэдгээ албан ёсоор мэдэгдлээ. Мөн Цагаан жагсаалтад Монголын сэтгүүлчдийн нэгдсэн эвлэлээс “Глоб интернэйшл” ТББ-ын тэргүүн, сэтгүүлч Х.Наранжаргалыг дэвшүүлж буйгаа албан бичгээр хүргүүллээ.